Hmanni College Bookroom (library a ni lo) ka hawng chu, lehkhabu fel taka ka rem sa kha, zirlai hoin an en velnaah, a ngai anga rem leh ta mai lo chuan, an zinga thenkhat chuan an lo rem thelh nuai mai a. Hei hi an tih dan, hrilh bik lem lova ka enliam fo thin a ni. Rem tha leh tura ka din lai takin he ngaihtuahna hi ka rilruah a lo awm thut a, 'Lehkhabu inrem tha sa zirlai hoin an chin pawr, kei an zirtirtu zawk mahin ka lo rem that fo nachhan tur bik a awm lo. Tunhmaa he mawhphurhna lo chelh thin Professor emaw Asst. Professor thenkhat ten an tih that peih loh avanga Bookroom ti pawha koh tlak awm mang lo kha a ni a. An tih ang leka tithei ka ni bik lovem ni? Hlawkna ka hmuh chu sawi loh, sum awm loh vanga hawn mumal theih loh kha restor a nih leh theih nan keima rem hriatnain sum ka dap a. India khawpui hrang hrang atanga lehkhabu chah khawmin ngaihtuahna ka seng a (mite ber pawh hian hetiang ngaihtuahna hi kan lo nei ve a). Campus chhung ngeia awlsam taka zirlaiten an mamawh an hmuh ve theih nan tiin ka bei bawk a. Chutianga ka tih tawh hnuin, felfai thlarha ka rem leh hnu chu, an nin careless takin an duh ang angin an hnutchhiah a. Duh duha an chin phar hnu hi keiin engah nge ka lo rem that fo bik ang ni?' ka ti a. Teaching kan pek bak, zirlaite hmakhaw ngaih vanga selfless taka ka tih thina ka ngaih chu chowkidar leh helper tih awmah ngaiin,...ka tha a na viau mai a.
Mahse, he tiang ngaihtuahna ka neih rual deuh bawk hian ka hnathawh chhan leh ka rawngbawl chhan bulpui ber ka ngaihtuah a. Langsar lo tur zawk ka ngaihtiahnaah a lansarh zawk vang maia 'tha nat thlak ti ka ni' tih ka hre nghal a. Tichuan, a bul atanga a tawp thlenga rem tha leh vek tur chuan ka che chhuak leh ta a ni.
Pathian rawngbawlna hnain a ken tel hi 'thut hmun atanga chin fel vek theih loh' leh, 'te lua, lian lua' awm lo a ni a. Mawhphurhna leh hnathawh duh zawng/chak zawng, a lian leh te, a ropui leh nep, a zahawm leh sitawm, phurawm leh phurawm loh, etc lo thliar ve fo pawh hi Pathian tana in commit (committed person) tawh tan chuan, a rem vek loh chin a lo awm thin a lo ni.
Hmanah, 'Pathian rawngbawl hna hian serh leh sang khawih, thusawi, mi duhsakna dawn ringawt a keng tel bik lova, a chang chuan postman leh newspaper semtu anga lehkha sema veng kil ber ber tlawh chhuah a ngaih chang a awm. Tin, thutna hahdam thlak leh chhuat laia thutsawp a ngaih hun, a tha tha leh mi duh mang loh chhe deuh chan hun, lirtheia chuan leh kea kal, etc a keng tel vek' tiin ka lo tlangaupui ve dap dap tawh a. Mahse, sukna ngai bawka let leh a ngaih hunte pawh a lo awm a nih awm hi...
