Kum 2017 chu kan lo hmang liam leh dawn ta reng mai. He kum hi ka thlir letin ka tan kum tha a tlingin ka hria. Pathian hnen a lawmthu sawina chi khat atan he kum 2017 chhung a - rilru a lo lang hmasa sa; min fuih a , challenge min pe a, ka rilru tilawm-tu ka thil tawn thenkhat kan tarlang ang e.
1. BCM ah bial neiin kum 11 emaw lek rawngbawlin hun ka hmang tawh a. Chumi hnu chuan M.Th ziriin, zir zawh-ah Serampore College ah zirtir hna kum 5 ka thawhna a lo ni ve ta reng mai. BCM Zion, Chawngte L mi leh sa, he kohhran atanga chhuak hi ka ni.
Kum 2017 a lo inher chhuah hlim khan, kan veng leh ka chhuahna, Chawngte L kohhran a Unit TKP te chuan ‘Pathian rawngbawl’ tura infuihna chi khat atan leh rawngbawltute ngaihhlutna thalaite zing a tuh a nih theih nan tiin TKP Group hrang hrang an thente chu tiang hian hming an vuah a;
i) Upa Dozamlova Group
ii) Tv Hrangnghilhlova Hroup
iii) Rev K.Lalzarliana Group
iv) Rev David Lalmalsawma Group...tiin.
Upa Dozamlova hi missionary, Chawngte L Kohhran tirhchhuah, an chawm; fak tlak a rawng a bawl laia thi ta a ni. Tv Hrangnghilhlova hi BCM missionary, Chawnngte L kohhran mi leh sa, BCM in chakma missionary a neih tawhte zing a chakma tawng thiam ber a a neih thin a ni a. A ni pawh hi Pathian ram tan a mi inpe leh tangkai tak, rawng a bawl laia thi bawk a ni. Tin, Pastor David Lalmalsawma hi BCM hnuai a Pastor fel leh tangkai tak, Pathian mi hman, Diltlang Bialtu ni mek a ni a. A ni nen hian BCM Zion, Chawngte L atanga pastor chhuak awm chhun kan ni.
Tling lo inti chung a rawng kan bawl vena leh inpekna-te ngai hlu a kan thalaipui ten TKP GROUP then hming atana kan hming hnaisai lo an hmang duh hi, ka hriat tirh chuan mak ka ti a. Unit TKP President ni thin Pu Hose Lalhmangaiha’n min hrilh hlim phei chuan ‘ka zak deuh’ tlat nghe nghe a. He, TKP te thiltih hian kei ni, a hming putu la dam laite hi min cho hle bawkin ka hria. Lalpa avang ni suh se chuan he tiang thil hi a thleng ngai lovang a; ‘an zinga thu sawitu leh infuihna’ chi khat atana an hman kha, hming putu leh neitute hnen a ring taka thu sawitu leh fuihtu a lo ni ta zawk hlauh erawh kan tan a hlu hle.
'A nachang an hria' hi fak an phu takzet a. Mi dangte tan entawn tlakin thil an ti tih loh rual a ni lo. Bungtlang S bialtu ni tur a chawlhkar khat emaw lek Bungtlang S a ka awm lai hian Bungtlang S Khaw thlang lam huap? Football match, Bungtlang S ah hian nghah a ni a. A tir a ka hriatpui sa lemlohin ‘Pastor Zartea Team’ an lo chhuak ve reng hi a ni a, an thleng sang ta lem lo nain, BCM Zion, Chawngte L Unit TKP thiltih nen hian damchhung a ka theihnghilh tawh loh turte zing a mi a ni awm e.
2. Dt. 15 – 19th, March, 2017 khan BCM rorelna sang ber Assembly chu Chanmari, Lunglei-ah nghah a ni.
He Assembly-ah hian pathian leh hotutte duhsakna in zing bible study hun khat ka chang ve a. He duhsakna ka chan hi ka ngaihhlut hle lain Kum 6 zet ka absent hnu a Assembly ka tel ve thei tur hi ka ngai hlu zual em em a (Assembly tel ziah hi deputation a hmun dang a awm ordain minister-te tan BCM hnuaiah hian compulsory a ni ve lem lo). Thlenkim zan kan inkhawm tum a ka awm dan kha ka la hre reng mai. Inkhawm hun zahve chhung zet chu ‘lungchhe reng’ ang ka ni. Lamtual a mipui lam hut hut zinga zuk inzeh ve kha ka chak em em a. Mahse, ka emotion sang lutuk kha control theih chhung control ka duh vangin lamna hmun em chu ka thleng zo ta lo a ni. Ka dam chhunga ka thil chhinchhiah tur Pathian leh hotute zarah ka experience niin ka hria a.
3. Kum 2017 chhung hian College Book-room enkawl turin mawhphurhna pek ka ni a. Kan College hian kum 200 na 2018 hian a lawm dawn tawh nain, College Book-Room hi hlawhtling taka an kalpui thu kan hre ngai lo thung.
Principal remtihnain Mizoram a ka awmtawhna Pastor Bial 3 ah BCM Hqrs remtihna in kut dawh ngawt mai teh ang tiin ruahmanna kan siam a. Thingtlang kohhran te an nih hlawm avangin rilruin a beisei ruk lawk chu 50,000/- vel bak a ni lo. mahse Kohhran leh mi thahnemngaite zarah Rs. 80,000/- chuang zet hmuh a ni a. Hei hi College in belhchhah hlekin Rs. 1,10,000/- velin bul kan tan thei ta a. Heng hi kohhran zara college-in kan thil dawn ‘TE-TAK-TE’ ang chauh a ni nain, College Book-Room erawh nasa taka tih changtlun a ni ta a. Pathian leh kohhran zarah pangngai takin a kal ve zel tawhin a rintheih hial a ni.
4. KA NGAIH PAWIMAWH BER: Pathian rawngbawltu tan chuan kan fel emaw fel lo emaw, kan tha emaw tha lo emaw, kan rilruin Lalpa hnen a beisei a neih reng pakhat chu – “ Lalpa aw hriat a, a pawlna thar a khat mawi tawk tal a chan thin” hi a ni.
Institution a awm a academic lama han inchiah deuh hian he tiang ‘chan theihna boruak?’ hi Pastor Bial aiin a lo tlem deuh nge, keimahni lamin kan lo zir tawk lo ve deuh thin hriat a ni law? Zep lovah chuan - khawhar taka kum kan chhiar liam chang a awm fo mai. Kum 2017 erawh thung hi chuan tum 3 zet experience duhawm tak Lalpan min paltlang tir ta niin ka hria a. Thlaler hmunah nen lam a a mite umzui a, Akor ruam (Hose 2:15) pawh malsawmna a chantir theitu hian A MITE – ngaihsak a, min kan thar a, min tihharh leh thin hi a lo duh reng thin a. Kan tan a ‘TAHNA RUAM’ ni thinah khan, ‘TUIHNA THAR’ kan dawn ve pawh min remtih sak thin a lo ni. Thisen zawmpui leh chhungkhat hnaivaite tan lo chuan ‘tukhaw-kha’ ngaihsak tlak lo hi, lei leh van Lal ber erawh chuan MIN HRE RENG thung a. A rinawmna tun thleng a mi hnaisai lo leh tling lote chunga a la lantir thin hi KA THINLUNG HIAN A NGAI HLUIN, LALPA CHUNGAH HIAN LAWMTHU SAWI SEN RUAL LOH kan ba a ni.
5. Kan kohhran Pastoral deparment chan, pastoral ministry hnuai a mi ka ni a. Kum 2017 hi kan tlingtlak chuan Serampore-ah kum 5 kan awm ve tawh dawn tihna a ni. Kum tir (2017) atangin chhuak ve ngei tawh tur a inbeiseina rilru-ah a awm reng a. Pastor bial hi kan thinlungin a thlakhlelh em avang leh, ka Nupui fanaute phei chuan kum 5 zet zoram an hmuh tawh loh vangin zoram chhuah hlan hi ‘khawiah pawh awm dawn i la’ rilruin a nghakhlel takzet a ni.
Amaherawh chu, College in kan service hi kum 3 chhung pawtsei turin BCM ah a dil teh tlat a. Chu chu Pastoral Committee hnuhnung ber chuan lo remti in, a kar lakah thil dang a thleng a nih loh chuan, kum 3 dang kan awm leh dawn tihna a ni ta reng mai. Heng thil vel chungchang a ka thawhna hotu-in ‘ka ngaihdan’ min zawh lai hian ‘Pathian hi a hlauhawm em avang leh, awmna tur a duhthu lo sam ve hi pastor tan thil tih chi ni a ka hriat loh avangin’ “ngaihdan sawi ngam chi ni ve pawhin ka inhre lo, hotu leh hotu inkara inbiak rem dan dan hi kan pawm ang” ka ti ve ngawt kha a ni a. Mizia, nihna leh thiamna avang pawh a ‘kan phak ve loh’ thil ni a kan hriatah khan keimah chauh ni lo, mi dangte pawhin min rinpui loh zawngin Pathian hruaina kan chang zel zawng a nih awm hi maw?
M.Th ka zir hma, Bial a ka la awm lai hian, “Lalpa, nangmah leh I ram tana kan tangkai ve theihna hmunah zel hian min dah la, tul taka i ram tana kan inhman ve theihna hmun a nih phawt chuan KA RILRUIN A PAWM THEIH LOHNA HMUN-AH PAWH NI SE min hung zel mai ang che” ti a ka tawngtaina kha Serampore experience hian min hriatchhuah tir leh thin. Serampore experience hi phek tam tak daih ziah tur ka nei nain heti chinah hian rek bung mai ang.
6. Kum 5 hma lam khan ka Unau pa Hmangaiha (Lalhmangaihzuala, lecturer HSS Serkawn) chuan Madurai ka awm lain BLOG min siam sak a, chu mi-ah chuan ka kutchhuak ho te te ka dah khawm ve thin. Sermon, article, bible study, etc leh thil dang mizo leh English-in ka tlar thla ve del a. Thu ziak 100 em pawh a la tling lo. Kum 2017 kum tir khan ‘thla tin thuziak pakhat tal dah leh ka tum ang’ tia ka rilruk kha ka ti hlawhtling niin ka hria. Ka testimony, Pathian hnathawh MAK ka tawn thenkhat te pawh a tir lamah ‘hai’ peihte tan a awm.
7. Kumin Krismas chu Kolkata Mizo Christian Service (CMCS) in ni 24, Sunday tlai thusawi turin min lo ruat ve a. He mi chungchang hi FB-ah ka dah tawh avangin hei chauh hi kan tarlang tawh mai ang e.
Kumin Krismas, CMCS zing a kan hmang thei hi rilru hlim takin kan haw niin ka hria a. Min tilawm zualtu point thenkhat te;
i) Kan kal hma deuh hian Pathian a lawman thuk tak Lalpan min pe.
ii) Madurai-ah kum 2 kan awm bakah, Serampore-ah hian kum 5 kan awm dawn ta a. He Krismas hi kum 7 hnu a krismas hla ka sak tam ber kum a ni.
iii) Chutiang bawk chuan kum 7 hnu a krismas thuchah mizo tawng a nuam ti leh zalen taka ka sawi hmasak ber a ni awm e.
iv) Kumin Krismas hian sum chuangtlai hman mai tur kan tlachham angreng a. ‘nei si, nei si lo’ in kan awm a ni. Kum thar (2018) ah haw ve ngei kan duh avangin Flight ticket book-na tur kan indah ve a, hman heu ngam a ni lo. January thla hlawh kan dawng tawh nain, thla hlawh (Monthly salary) hi kham ngawr ngawr, a chang phei chuan kham lo nasa tak…kan nih avangin lo hman lawk ngam a ni bawk lo.
Tichuan leh, kan Nu hriatpui vak lohin Krismas hmanna tur pawisa Rs. 11,000/- puk in kan chhuak ta rawih a. Amaherawh chu, a mite ngaihsaktu Lalpa hian kan mamawh hi a va hre tehreng em...
Kan rawngbawlpui, kan U Te -Rev Sangtea te chhung fin kan ni a. Pu Michael-a (Pu A-Puia) te chhung, Pu Sangtea te chhungte hnai tak, Pu sangtea te Krismas rawn hmanpui an awm bawk. Pu sangte te Nupa (Pi Chhungpuii) hian duhsak namen lova min duhsak bak-ah, Pu A-Puia te chhungkua hian, “Kan Pastor te hi Krismas present kan la pe ve reng reng lo” tiin kan Nu hnenah pawisa a hlan mauh mai a. A Nupui (Pi Aluri) hian kan kan fate leh kan Nu tan thil tamtak a lei sak tawh avangin ‘Ka inthlahrung takmeuh’ a ni. Rs. 2000/- a pe maw ka tih kha a lo ni tawp lo lehnghal....
Mu tur a room kan luh hnuin, kan Nu chuan, “Pa, an pawisa min pek hi a tam lutuk a, ka lung a chhe deuh tlat nia” a ti a. “Engzat nge?” ka tih chuan, “Rs. 14,000/- lai a nia…” a tih chuan – sawi tur reng ka hre lo. Ka ngawi reng a, ‘Lalpa min ngaihsak zia hi’ tiin mak tiin zing lam dar 3 thleng ka meng a, Pathian hnenah lawmthu ka sawi a. Lalpan min ngaihsak takzet a ni tih hi rinhlelh rual lovin a tilang leh ta niin ka hria.
Kan sum puk rulh leh dan thlengin ‘min ngaihsakna’ hi Lalpan a tilang zel a, min ngaihsakna tilang turin ‘amite zingah’ min hungin, a hun takah a mite hi kan hnenah a lo tir leh mai niin ka hria a. Lalpa rinawmna hi kan tan hian 'a mak' tih loh rual a ni lo.
TLIPNA: Heng bak pawh hi ziah tur ka la nei nual a, heti zawng hian a tlang kawm tawh mai ang.
Kan hmabak kum 2018 lo inher chhuak leh tur pawh hi eng tiang angin nge kan hmachhawn dawn tih kan hre hauh lo. Amaherawh chu, a mite dinpui a sawipui thintu, kan hriat mang loh lai nen lam pawh a, a mit kan chung a len a, ‘keini ang paltlang ve rual a ni lo’ kan tih kawng nen lama min zawhpui thintu Lalpa hi kan Pathian a ni. Chuvang chuan HE CHHUNGKUA hian kum lo thar zel turah pawh hian Lalpa hi a vuan ve reng dawn a ni.
