(TESTIMONY)
K.Lalzarliana Kum thar resolution an tih hi ka pianthar hlim, kum 15 emaw lek ka nih atangin ka ngai pawimawh viau thin. Kum thar hmachhawn tura mimal inbuatsaihna pakhat anih avang leh mihring nuna nghawng nasa tak nei thei a nih bawk avngin ka la thutak ve viau bawk. Heng avang hian College (B.A/secular) ka zawh hnu kum 20 ka pelh thlengin ka siam fo a, kum 10 emaw dawn lai chu khunkhan takin ka lo ti tawh thin awm e.
'Kumin-ah hian Bible chhiar chhuah ngei ka tum ang' emaw 'Chanchintha ziak chin tal hi ka chhiar chhuak ang' tih hi a tel chawk a. He thutiam avang hian Bible bu pum leh chanchintha ziak bik ka chhiar zawng zawng lak khawm phei chuan N.T (Chanchin Tha Bu) bik phei chu Vawi 18 zet ka chhiar chhuak hman hial a ni. 'Ka dam emaw dam lo emaw kumin chu inkhawm vawikhatmah ka thulh tur a ni lo' tih te, 'Ka Nu & Pa thu hi a kawi a ngilin zawm vek ka tum ang' tih te, 'Zuk leh hmuam lakah ka inthar fihlim tur a ni' tih leh, 'Ni tin vawi 3 tal ka tawngtai ang... 'etc tih thutiam ka siam thinte kha lar zual a ni a. Khan hun kha tun hnua ka thlir kir chang chuan, lung a tileng ve lek lek thin.
Hriat mang loh kar hian tunah chuan Kum 40 chunglamah kan lo awm ve reng tawh hi a lo ni a. Mihring danin tun atanga kum 10 a ral leh meuh chuan 'upat lam kan pan ve ta' tih hi rilru-ah pawh a piang ve ngeiin a rinawm. Kum 20 a nih chiah loh pawhin kum 15 zawng a ni ngei ang - hetiang thil tha tih nachang ka hriat tawh mang loh hnu hian, kum 2015 lo inher chhuak tur khan eng emaw titakin rilru a kap tlat mai a. Tlangval lai ang em a thutiam han siam hluai lah chu a naupan chhiatthlakin ka hre deuh bawk si. "Eng tin chuan 2015 hi hmachhawn ang i maw" tih hi rilruah a cham tlat mai a. Tichuan a tawp atawp-ah chuan he CHONA, THUTIAM emaw THUVAWN ni bawk hi ka lo siam puitlinin a lo awm ve leh ta nge nge a ni.
Chu thil (commitment/thutiam/thuvawn) chu eng dang ni lovin, "A HMA AI ZAWNGA NANG HNAIH LEHZUAL CHE HI KA DUH, LALPA" tih hi a ni e.
He tiang commitment/chona/thutiam/thuvawn min siam tirtu hi point langsar deuh deuh a awm a, chungte chu;
1. A 'Aw' hre ngai lo Lalpa Pathian rawngbawltu nih hi ka duh lo.
'Lalpa Pathian rawngbawltu, Lapa Aw hre ngai lo, dawng ngai lo, Thlarau lam Nunin a dawn thar sawi tur pawh nei ngai lo' nih hi Pathian rawngbawltu tan chuan thil serious a va tling em. Pathian rawngbawltu ten 'Lalpa Aw' hi kan hre ngai lo emaw kan dawng thar ngai lo takmeuh a nih chuan a chhan leh vang chu eng dang ni lovin, a lakah kan lo tawlh hla viau thin a lo ni. Chuvang chuan kei zawng, he tiang mi nih hi ka zuam mawlh lo ve. Chuvang chuan 'A HMA AI ZAWNGA NANG HNAIH LEHZUAL CHE HI KA DUH A NI, LALPA".
2. Ka tawngtainate hi chhanin awm fo se tih ka duh.
Tawngtai thiltihtheihna experience tawh chuan tawngtai hlutna hi kan hre vek awm e. Pathian rawngbawltu 'tawngtai ngai lo emaw tawngtai tha peih lo' hi thil awm thei lo emaw kan ti ang e. Thil awm thei a ni takmeuh meuh a ni. He tianga mi a awm chuan phat rual lova a chhan pakhat ni thin chu ' A tawngtaina Lalpan a chhan leh chhan loh a hre ngai tawh lo' a ni chawk. Mi, a tawngtainain thiltihtheihna nei lova a inhriat tawh chuan a tih tur awm chhun pakhat chu ' tawngtai chawlh san hret hret a, a tawpa chawlh hlen' hi a ni. Ringtu pangngai emaw mi satliah kan tihte hian tiang hi an tawng a nih chuan ngaihthiam theih chin a awm maithei. Amaherawh chu, Lalpa Pathian rawngbawltu 'tawngtai chawlh san' erawh rawng a bawlsak Lalpa leh a kohhrante hian an palzam thei dawn em ni? Chuvang chuan ka tawngtaina te hi a hma anga min chhan sak fo ka duh avangin kei chuan - 'A HMA AI ZAWNGA NANG HNAIH LEHZUAL CHE HI KA DUH A NI, LALPA' tih hi ka thlang that a ni.
3. A hmaraw tangkai zawk nih hi ka beisei dawn.
Chhiahhlawh, a Pu-in a mamawh hun pawha a hman tangkai tawh loh hi awm ta se. Chhiahhlawh nep berte zing a mi a ni ngei ang. Pu ten an chhawr tangkai tawh loh chhiahhlawh hi chuan 'Pu ber hremna' hi dawng chiah lo pawh ni se, a Pu lakah a tuitla tawh lo takzet tihna a ni. He tiang mite hi an ni - 'Pu ber Aw' hre ngai tawh lo office-staff, mahni tlat tlata 'Pu-te Office a lo tei ve mai mai', Office dawrtute tana tangkai chu sawi loh 'hnawksak' tih hlawh zawk fo hnathawktu chu. He tiang mite hian thawh tur an hre hlawl lo, an hawi lawl lawl a, mi sut kuak sa-ah hian an inrawh ve chang chang chauh a ni. An hlawh tawk hna an thawh miau loh avang leh Pu ber laka an tlaktlum miau loh avangin eng pawh tiin khawi hmunah pawh awm se 'an hlimna a famkim thei tawh lova'. Ka awh loh zawng tak mi an ni. Chuvang chuan kei zawng 'a hmaraw tangkai zawk rawngbawltu nih hi ka beisei tlat dawn avang hian' - "A HMA AI ZAWNGA NANG HNAIH LEHZUAL CHE HI KA DUH, LALPA".(Edit loh...edit tur)
4. Ka Nuna inrawh tura ka beisei tlat avangin. (to be continued)
5. A rawngbawl hna hi ka thlan miau avangin (to be continued)
5. Hmangaih tlak loh hi min hmangaih muai avangin. (to be continued)
18.01.2015
