ACADEMIC SESSION THAR 2017 atan vawiin khan kan College chuan BD zir tur kan la leh nual a. Heng zing a nula 1, naga nula chu a nu leh a pa-te an inthen tawh a. Ama sawi dan tak phei chuan '''brocken family' atanga lo kal ka ni' a ti. Unau 7 an ni a, a u leh nau thenkhat a pa hnenah an awm a, a then hi amah nen a nu hnena awm an ni awm e.
'I nu chuan enge a thawh ' tia thawhpui ten an zawh chuan buai map lo hian ' *Prayer warrior* a ni' a ti mauh mai a.
Zirtur, interview a kan lak hian sum leh pai lama ngaihtuahawm an nih leh nih loh hi uluk takin kan thlithlai thin. College dang ang a Kohhran behchhan bik nei a nih loh a vangin kan zirlaite hi fee-ah buai lo thei se tih hi College duh dan a ni a. Zirlai harsa takzet tanpui loh-theih loh hi College in tanpui dan a dapin a tanpui reng chung hian; College inrelbawlna tibuai pha thei he tiang zirlai kawl teuh loh dan hi kan rilruah a awm ve bawk a.
Tichuan he tiang hi kan dinhmun a nih avangin; an nu leh pa ten enge an thawh?, financial guaranty/sponsorship an nei tha em, etc tihte hi zawhna pawimawh tak, zawhna kan zawh ve fote zing ami a ni. Candidate, interview hmachhawnte hian sum lam a ngaihtuahawm an nih loh chuan sawi nuam pawh an ti ve viau thinin a lang a. Amaherawh chu, financially a support tu an neih that loh chuan rilru helhkham nei tak a interview room an chhuahsan changte pawh a awm ve bawk thin awm e(?).
He nula makna riau chu; zawhna a chhan lai khan 'a nu tawngtai mi' a nihna hi a ring satliah mai ni lovin, a hriat ngai loh professor rual zingah khan *a Chhuan hmel* riau khan ka lo hmu a. Ka lawm viau rualin, sum leh pai lama innghahna a neih chauh zia ka hriat khan lehlamah ka lainat a. A nu tawngtaina leh Pathian a rinna ka hmuh khan mak tihna erawh lian tak ka nei bawk a. Ka rilruin, 'He thil hian kei leh mi dangte tan challenge nasa tak min hnutchhiah ngei dawn e' tih ka ngaihtuah hial a ni.
A lo thlen hlim hian a Nu leh a U mipa-in an lo hruai a. An tan awmna ngaihtuah a buaithlak-a ka rin vangin hostel-a kan Guest room-ah ka dah kha a ni a. A Nu chu an awmna tur Room a lut nge lut lo, a fanu sawi ang tak tak chuan a tawngtai nghal a. Hei mai hi ni lovin - a fanu-in written a neih lai leh, interview a hmachhawn lai pawhin roomah tawm-in a fanu tan chuan a lo tawngtai ngat ngat bawk a (a hnu a an awmna room a awm vete min hrilh). Mahse, thil ka lo hrilh chiang lo nge ni dawn? vawiin a an room a ka va tlawh chuan a fapa nen an lo chhuak daih tawh a. An train chuanna tur nan hman loh hlauin hmanhmawh phelengin an lo chhuak daih tawh hi a ni awm a. An awmna man ROOM FEE pek nachang reng an hre chang tawh lo.
A chanchin tlemte ka hriat chhunte avang hian - 'He Pathian mi hi hmu leh tawh dawn lo pawh ni i la, a hnena Pathian awm rinawm zia hi enge maw zawng tala hriat nawn tir ka va duh em' tih ka ngaihtuah mek laiin. A fanu BD zir tura kan lak thar chu hostel kiang-ah ka tawk ta a, a hnenah chuan -
'i Nu leh i U hi Khawnge, an roomah ka va hmu mai lo ve...?'
'Sir, an haw tawh...'
'Room fee an pek theihnghilh daih tihna a nih chu...'
A hmelah chuan pawi tihna leh inthiam lohna a piang tan mek tih ka hmu reng mai, mahse, he tiang hian ka sawi chhunzawm nghal a, 'i nu chu lo hrilh la, an room awm man pek saktu hi Pathianin ka hnenah a lo tir daih tawh' tiin. Tichuan ka kalsan ta a. A hmel a lawmna lo lang kha ka hmu hman reng. Min biak pawh a duh ngei ang mahse ka kalsawn nghal avang khan engmah a sawi zui hman ta lo a ni.
He nu, kan zirlai thar tur te reuh hi sum leh pai-ah mite angin innghahna chhuan tlak a nei lutuk lo niin a lang. Mahse a rin Lalpa, a Nuin a auh thin Pathian engkim tithei hian a ngaihtuah ang tih hi ka ring tlat a. LAINAT A, SUM LAMA TANPUI THEI AWM HIAL SE THA TUR.......
BD KA ZIR TANTIRH A THIL THLENG VE THUNG.
He Nula chanchin hian kum 20 tling lek lek kal ta a BD zir tur a ka inbuatsaih lai leh, ka zir tirh, kum hnih chhung a ka hun tawn tawh kha min tihre chhuak a...
BD zir tur (Pathian rawngbawl tak tak tura commitment tihhlawhtlin) a inchhungkhur ka chhuahsan dawn tak tak chuan he ngaihtuahna te reuh hi rilru-ah ka nei ve a..'Ka U te 2 in nupui an neih tawh avangin, kei lo chu Nu leh Pa hmangaih tak tak tur an awm tawh lo. An ni chuan hmangaih hle mahse Nu leh Pa aia hmangaih tur Nupui an nei tawh a...kei hi ka kal chuan tunge an upat a, hna an thawh theih loh hnuah chawm ang' tih hi...
He tiang rilru pu chung khan ka kal ve ta rawih kha a ni a. Mahse ka tawngtai apiang a Lalpa kar-na erawh thil pakhat ka nei a. Chu chu - "Ka Nu leh Pa a chawm zel theih nan Lalpa ka U hi hna nghet pe rawh" tiin (kan Upa ber hi hna nghet neiin a indang tawh a, tuna ka U sawi erawh inpui nghaktu a ni). Nitin vawi thum ai tlem lo tawngtaia dilin Pathian ka dil thin a. A kum hnihnaah chuan kan U pakhat Lunglei ami hian phone-in "ka U in hna a hmuh thu" min lo hrilh ta a. Khami ni a ka lawm zia kha ka la theihnghilh thei lo (He thil hian testemony dang a la nei). Ka U in hna a hmuh chhan chu ka tawngtai chhanna a ni tih hi ka chiang hliah hliah a. A hnuah ka hrilh hial a ni.
Heng ka sawi kai duah chhan ber chu - Lalpa hi 'a lama rilru dik pu thinte laka a chak zia tilang thin Pathian a ni' tih hi a ni. Vawiin ka thil tawn hian heng ka chanchin thenkhatte nen lam hian min ngaihtuah chhuah tir a. Ka sawi ngai zen zen lohte nen lam ka han puangzar ta erh a nih hi.
