THOLEH NUN

(John 20:11-18; I Kor 15:55-57; Eph 4: 25-32)

‘Tholeh Nun’ tih hi kawng hrang hrangin mi ten thlarau atanga an hriat dan an sawi thin a. Tun tumah pawh hian he ti-zawng hian I lo thlir ho ve dawn teh ang.

THOLEH NUN CHU;

1.    THIHNA PALTLANG NUN A NI:
Pastor Bonarious-a thusawi ka sawi chhawn ve fo 1 chu, “ Mi a lo pianthar hian a nuna thlipui pakhat chu nuai bovin a awm tihna a ni a.Amaherawh chu, a dam chhunga reh tawh ngai lo tur thlipui dang chu chuan a chawk tho thin” (hmun danga ka sawi dan nen a hrang hlek maithei. Hei hi ka hriat dan chiangnial zawk a ni).

A awmzia hi tiang hian a sawifah theih ang a. Kan pianthar hma chuan TISA MI kan nihna chu a duh ang angin, zalen takin, dodaltu nasa tak awm lovin a awm thin a. Rilru dan (moral law) kan neih ramri a thiat a nih loh chuan kan chak leh duh zawng apiang zalen takin kan ti mai thin. Amaherawh chu, mi a lo pianthar chnah chuan Thlarau dan amah a lo awm chuan Tisa dan chu rap betin, mi thenkhatteah chuan a chhem kiang/dai thin a. mahse he tisane hian eng emaw hunah lo thanharh hun a lo nei ve leh thin a (rinawm lohna a lo thlenin, thlarau duhzawng kan tih hleih theih loh changing, etc) Chuvang chuan Galatia 5: 17 ah pawh Paulan, “ Tisa hian Thlarau dona lam a chak thin a,Thlarau awhin tisa dona lam a chak bawk thin” a lo ti chiah reng a ni.

Tichuan THOLEH NUN kan tih kha THLARAU DAN lal ram chhung a mi a nih avangin, mi piangthar tawh pawhin A Thlarau dan aia a Tisa dan a vulh nasat/len zawk chuan Thlarau dan hi che hleithei lovin a siam thin a. A khuh bo thei hial a. A tawpah phei chuan Mi piangthar ni reng chung siin RINGTU TISA MI a lo ni hial thin a ni.

Amaherawh chu, Joh 12: 24 in a sawi angin “Buh fang leia a tlak loh va a thih loh chuan a mal chauhvin a awm reng thin. A thih erawh chuan tam takin a rah thin…” a tih angin; Tisa dan, tisa duhzawngte hi hnawl, tihhlum a nih chuan- chu ringtu Nunah chuan THOLEH NUN kan tih kha duhawm leh mawi takin a lo inlar/par chhuak thei thin a ni.

Thihna pal tlang Nun a nih avangin zoram ringtute hian he mi chungchang ah hian tihsual kan nei fo a. Vawi khat thihna ring a tholeh nuna nun reng kan tum a, kan hlawhchham leh thin a ni.
I Kor 15:31 ah chuan Paulan, “Ni tin ka thi thin…” a ti. He tiang mite Nunah hian a hun takah, Tholeh Nun chu mawi takin a lo par chhuak a, mi dangte tana nun awhawm, belh tlak an lo ni thin a lo ni.

He tholeh Nun chhem alh zel tur a THIHNA (kan tih), kan bitum tur hi mi hrang hrangteah a in thlauin a inang lo thei viauin a rnawm. Engpawh ni se, kan tisa chakna leh it zawng ai pawh a Lalpa Pathian/ keimahni a Thlarau awm lungawina lam kan hawi/tih hram hramna hian THOLEH NUN kan tih chu fiah lehzualin a lantir thin a ni.

2.     A HUN TAKA  THO-A, CHE CHHUAK NUN A NI
Heng bung leh changahte hian Lal Isuan a thawhleh tur thu a sawina kan hmu – MT 16: 21-23; 17: 22-23; 20: 17-19)

A hnu a a chunga thil thleng chu chipchiara sawi awh ngai lovin kan hria. Chu chu – A sawi lawk ang ngeiin “Mi thi zing ata a tho leh ta…. Tih hi a ni.

Hei hian a entir chu – Tholeh Nun chu a hun takah a tho a, a tho mai ni lovin a che chhuak bawk a ni.

Chuvang chuan Tholeh Nun putu – thu thluang, delh beh, che chhuak thei lo ringtu nih hi thil inhmeh lo tak a ni.

Lal Isua thlan thim atan a tho a, ropui taka mi dangte tan, mi dangte hnenah Nunga a inlar a a che chhuak ang hian he Nun hi thawhlehna tawmpuitute Nun-ah a bet tlat tur a ni ang.

3.    DANGLAMNA A THLENG NGEI THIN
I Kor 15 :49 ah chuan, “Leia siam mi anna kan pu angin, vana siam mi anna chu kan pu bawk a ni” a tih angin; Tholeh Nun tawmpuitute Nunah hian Danglamna a thleng thin.

Joh 20:17 ah hian Mari leh Lal Isua (thawhleh hnuah) inbiakna kan hmu a. Mari’n, “Raboni”, tiin Isua kha va khawih a tum a ni maithei. Isua’n a lo chhan dan chu –“ Mi vuan tawh suh” tih hi a ni.

He thu in ka nun a den ve dan chuan – Tholeh Nun tawmpuitute tan chuan khawvel thil nena inzawmna neih hi a hma ang ngawtin a rem ve tawh lo va, danglamna a thlen tawh avangin kawvel thil- thlarau dodal theitu nena inkungkaihna, inzawmna kan neih hi a rem tawh lo a ni.

Danglamna bak-ah, “Mi vuan tawh suh” tih hi khawvel thil kan hmachhawn dan tur a ni tawh tur a ni.

4.    HMUH THEIHIN A INAR CHHUAK NGEI THIN
Joh 20:18, 25 ah chuan mari leh zirtir thenkhat ten Isua thawhleh hnu a thawhlehna chungchang thu a thusawi chhinchhiah tlak tak an neih chu – “Lalpa chu ka/kan hmu ta” tih hi a ni.

A awmzia, he thu ziaktu Nun, he Pathianthuin a khawih dan-ah chuan – Zirtir ten thawhleh hnuah Isua an hmuh thu a remchan ang ang a puang chhuak a, “Lalpa chu kan hmu ta” an ti ang hian, thawhlehna tawmpuitu Nun chu “Mi dangte tana hmuh theih” a ni ngei thin a ni. Chu mai chu ni lovin, hmutu te tan hian hai rual lova chiang a ni tur a ni a. “Lalpa chu kan hmu ta” an ti ang hian, kan chanchin hi mi dangte tan rinhlelh rual lova fiah leh chiang, sawi chhawn tlak a ni tur a ni.

5.    HNEHNA AVANGA PATHIAN CHAWIMAWI NUN A ANI.
I Kor 15 : 57 ah chuan – “Kan Lalpa Isua Krista zara hnehna min petu hnenah chuan lawmthu awm rawh se…” tiin Thawhlehna chungchang thu a sawina ah Paulan he thu hi a sawi a.
Hnehna avanga Pathian hnena lawmthu sawina a ni.

Chuvang chuan, Tholeh Nun chu Hneh a awm – tlawm thin, tlu leh thin, hnungtawlh thin, chauh hrat, etc ni ngawt lovin – HNEHTU NUN, hnehna hlu tak avanga Pathian chawimawi Nun a ni ngei tur a ni.

KA TANA (KOHHRAN TANA MI) HNAWKSAK BER

LK 14: 26-27 – “ Tupawh ka hnena lo ka chuan, a pa te, a nu te, a nupui te, a fa te, a unau te, a farnu te, ama nun nen lam pawh a huat loh chuan ka zirtir a ni thei loving”

Pathian mite/ mihring te hi eng titurin nge Lalpa kan Pathian hian min duh? Tiin inzawt ta I la. A chhanna hrang hrang zingah thenkhat chuan tiang hian kan chhang mai thei;
1.    Chanchintha hril a, thlarau bote chhanchhuak turin
2.    A rawngbawl a, Eng turin
3.    Tawngtai turin
4.    Amah faka chawimawi turin
5.    A khaikhawm nan: A TANA NUNG TURIN

Piangthar hlim leh thlarau Nun a kan tuihnan lai chuan heng zawng zawngte hi tute pawhin thupui bera kan neihte vek an ni. Amaherawh chu, hun a liam bek bek a, ni tina kan thil hmuh leh hriat te, kan thiltih duh zawng te avang hian kan thlarau chim chin hi a lo phai ve thin a. Chu tiang hunah chuan khing a chung a Lalpa min beiseinate khi kan tan phurrit em an nih loh pawhin ‘tuipui ber-ah’ kan nei hleithei lo fo thin.

He tiang hun a lo thlen a, zawhna pawimawh tak mi tam takin kan hmachhawn thin pakhat chu – Mi piangthar dik tak, Pahian Thlarau-a lawm thin, tui taka tawngtai thin, amah faka lam thin te hian engah nge Lalpan min beiseina nia kan hriat te hi kan bansan a, tuipui bera kan neih theih tak loh? Tih hi a ni thin.

Israel fa ten tuipuisen an kan a, hlimna namen lo an chan hnu-ah, thlaler ram ro an hmachhawn a, chu hmunah chuan awm dan an thiam ta lo ang mai kha kan ni thin.

He tiang hi kan chung a a lo thlenin a chhan leh avang kan dap a. Thenkhat chuan puhmawh tur chi hrang hrang kan dap kual a. Thenkhat chuan - Kohhran hruaitute Nun dan leh thusawi ro lutuk te kan puh a. Thenkhat thung chuan, kan bulhnai leh chhehvel a puhmawh tur kan hmuh an gang te kan dap kual chiam thin.
Entir nan (Illustration);
1.    Materialism
2.    Individualism
3.    Social media leh a tuifawn
4.    Thenkhat chuan khawvela thil hlauhawm 3 an sawi thin WWW (Woman, wine, wealth) an refer bawk a.
5.    India Today in a tarlan 1 Tunlai India thalai ten an buaipui chu- 3F Formulae (Fashion, Food, Fornication) a ni e an ti bawk (maithei).

Heng a chunga kan sawite hi, tunlai (a bik takin) thlaite nun hruai kawi a, Krista hnena mi dangte hruai botu-ah kan puh thin. A dik pawh a dik ang.

Tum khat chu KA TANA MI HNAWKSAK  chungchang thuah hian Lalpan thil min zirtir ve a. Ka tana HNAWKSAK ni a ka hriat ka dap khawm chiam hnuah a tir a ka thil hmuhchhuahte chu a chunga kan sawi/tarlan takte bawk khi a ni. Mahse, Lalpan min zirtir chhuah a tum hi hemi tum hian he lam hi a lo ni hauh lo mai a. Thlarau Nun nghawng thei thil hnawksak kan tarlante hi KA TANA HNAWKSAK BER an ni ve lo tihna a ni.

He thil min zirtir a, thil pakhat min hmuhchhuah tirna hmanrua atan PASTOR QUARTERLY REPORT min hman tir a. Uluk taka ka report te kan exam khan ‘TUN HMA KA PHAK LO A NI’  tih ka hmu chhuak thuai a. Chu chuan Lungawi lohna/ duhkhawp lohna min siam a. A chhan leh vang nasa taka ka dap hnu-ah a chunga kan sawi takte bak-ah KA TANA HNAWKSAK BER  ka ka puh thluk tak ber chu – KA NUPUI/ KAN NU a ni.

Kan inneih hlim a ni a. Kan inthlahlel ve vuai hi a lo ni a. Tute maw danin,  hmangaihna par kan lawm tawn lai chuan – Rinna a ke pen tulna a lo awmin (Bial fan, home visit, councelling, tawngai rawngbawl, etc) Innei hlimchhawn inthlakhlelhna khan ka tih tur thenkhat min tih tir lo fo mai hi a lo ni a. Ka hlimpui ber thin Lalpa rawngbawl, a duh zawng tih, tawngtai, ka hun zawng zawng atana hlan, Amah faka chawimawi, etc te kha hlimpui/tupui berah ka lo nei lo tan reng tawh kha a lo ni.

Chu chuan hriat loh Karin min pawt hniam hret hre a. Ka hlimpui ber, ka hmangaih ber, A tana engmah ui leh zuah nei ngai lo khan – hlimpui dang, tuipui dang, ka lo nei reng tawh a lo ni.
Chung zawng zawng ka chunga a thlen chhan bulpui berah chuan KAN NU  ka puh thlu vek a. Hmuchhuak tha inti em emin, kan Nu pawh ka haw lek lek  hial a. Ka rilrute te in ‘Lalpa aia ka thlan zawk tur hi engah nge a neih pawh ka lo neih rweng reng le’ te inti rilruin. Hmuchhuak tha ka inti viau a. Adama ang deuhin Ka Nu chu engkim deuhthawh-ah ka kawk (puhmawh) vel vek a ni ber.

Mahse, hmuchhuak tha inti angreng taka ka awm mek lai chuan KA TANA HNAWKSAK BER  chu KAN NU ni lovin KEIMAH KA NI tih Thlarau Thianghlim puihnain Lalpan min han hriattir mai chu; ‘Sawi tur reng ka nei lo ve, Misual mai ka ni’ tih ang deuh khan. Lalpa hmaah ka tlawm chiang ta hle mai.

Eng tur ka en loh chhan te, thlarau bo leh riltam ka vei tawh loh chhan te, tawngtai ka tuipui zawh tawh mang loh chhan te, zalen taka Lalpa faka ka chawimawi theih mang tak loh chhan berte chu – Kan Upa thusawi ro vang emaw,  kan rawngbawltu nuna ei tur awm loh vang emaw, ,materialism, WWW, 3F Formulae, Nupui fanau te, etc emaw lam ni lovin. KEIMAH  ngei hi ka lo ni a. KA TANA HNAWKSAK BER PAWH ‘KEIMAH’ ka ni.

A chhan chu, kan thil hmuh leh hriat, kan kiang vela kan nun leh rilru hruai kawitu a kan puhte hian KAN DUHTHLANNA TEL LOVIN engmah tih theih tak tak an neih loh vang a ni. Eng ang pawhin an hipna nain, an nawrna hi hnar har mahse; an thu hnuaia intulut tura duhthlanna tawp siamtu chu KEIMAH ka ni.

Tichuan, tlemin pen belh hlek ta I la. Ringtu inpawl khawm, kohhrante zinga mi hnawksak berte zinga pakhat pawh hi kan pawm duh tak tak a nih chuan MAHNI vek hi kan lo ni a. Kohhran ro chhan, kohhrana buaina tipunluntu, kohhran hmel tibal zualtu, etc pawh hi kan puh phal lo mai mai thin pawh a. A nihna takah chuan MAHNI inman lote avang vek, MAHNI  hi kan lo ni zel a lo ni.
Keimah a Thlarau Thianghlim zalanna daltu lian ber pawh THIL DANG  emaw ka tih kha, MAHNI  bawk hi a lo ni a.

Pastor Horatious chuan, “ mi a lo pianthar hian a nun-ah indona reh ngai lo tur chawh thohin a lo awm a,khawve mi nihna/mihringhlui zia chu vawi lehkhatah che thei lovin rah behin a awm a, mahse chu ze hlui lo harh chhuak thar leh thin chuan  amah a thlarau awm chu a damchhungin a do tawh thin” (a sawi ang takin ka tarlang thiam ta chiah lo) a ti a. Chu ze hlui lo thangharh leh thin kan do ber tura pawh chu MAHNI kan tih hi a ni.

Lal Isuan LK 14: 26-27 ah chuan – “ Tupawh ka hnena lo ka chuan, a pa te, a nu te, a nupui te, a fa te, a unau te, a farnu te, ama nun nen lam pawh a huat loh chuan ka zirtir a ni thei loving” a ti a. Ringtute hian huat emaw do hmaih kan neih thin pakhat pawimawh em em si chu ‘A MA NUN NEN LAM PAWH’ tih lai a hi a ni.

HNAWKSAK BER DO HLAWHTLIN HLAWKNA
Hmuhchhuah tur dik hmuhchhuah leh do tur dik do hlawhtlin hian hlawkna nasa tak a nei a. Chu chu kan sawi hmaih thei loving. (chipchiarin erawh ka ziak hman ta lo)

Roreltute 7: 16ff
An Hmelmate tizama, tlawm tirtu – indona hlawhtling hmachhawn tirtu hi a ho angreng hle mai. “BEL VUAK KEH A, A CHHUNGA ENG PHO CHHUAH”   hi zuk ni teh daih a! (tum khat chu he thu hmang hian Lalpan he ti zawng hian min pawl tlat tawh a ni)

Chutiang bawk chuan, Pathian Thutakin an Nun a vuak keh sak te Nun-ah hian ENG  danglam tak pho chhuahin a awm thin a. Hmelma (setana/thmena hrang hrang) an hmachhawnin he ENG hi an ralthuam tha ber a nih avangin HNEHNA  an chang leh thin a lo ni. Nun vuak kek saka awmte hian Lalpa hi Thlarauin an fak thin a, rinna in  an pen a, hnehna puanzar hi an lek chhuak thei thin a lo ni.

Mahni inhmuhchhuah leh do tur dik do hlawhtlin hian thil a van lo su kaw nasa thin em.

Illustration:
1.    Tenawm zu zuar leh keimah (to be continued)
2.    Dtl Upa-te & BMP buaina a Inremna Mittui luan tirtu (to be continued)

THI TLAK - LAL ISUA

Mat 26: 66 - Tin, Puithiam lal ber chuan a silfente a pawtthler a, "Pathian a sawichhe ta; hretu dang engah nge kan ngaih tawh ang? Ngai teh u, Pathian a sawichhiat zia chu tunah in hre tawh e. Eng tin nge in ngaih?" a ti a. Anni chuan, " Thi tlak a ni" tiin an chhang a.

Thuthlung Thar-ah hian "THI TLAK" tia a Pathian Thu-in a sawi leh a sawi fak si loh mahse ‘THI TLAKA” ngaih hi mi tlemte kan hmu a. Chung zinga sawi hmaih theih loh mi langsar pahnih kan neihte chu - BARABA  leh LAL ISUA te hi an ni.

BARABA : A ni hi, chanchintha ziak hrang hrang a tarlan dan chuan;
1.  Helte zing ami tualthattu (MK 15: 7) a ni.
2. Helna leh tualthah avanga tang (LK 23: 25) a ni
3. Suamhmang (John 18: 40) tiin tarlan a ni.
4. Mi tang hmingthang tak (MT 27: 16) tiin kan hmu bawk.
He tiang mi tawrawt, Rome sawrhkar rorelna duh lova helte zing ami hi sawrlai lai thuneihna fawng vuantute tan chuan khawtlang leh ram tana mi hnawksak leh hlauhawm a ni ngei ang a. Thi tlak tiin Bible hian a chungchang thu  hi tarlang chiah lo mahse. Rome sawrkar aiawh leh Juda mipui rorelna hma a Lal Isua nen khaikhin a nih danah hian THI TLAKA NGAIH TURTE ZING AMI  a ni ngei ang.

LAL ISUA    : Thi tlaka ngaih, chanchn tha ziaka kan hmuh dang awm leh chu; Lal Isua hi a ni a (Mat 26:66). Marawh chu Baraba ang lo takin a chanchin chanchintha ziaktu ten an record dan erawh a danglam hle.
1.    He mi danglam tak hi Pathian Fapa tia inchhala kha a ni a.
2.    Hebrai 4: 15 ah chuan, “keimahni anga kawng tinrenga thlemna tawk tawh sual erawh chu sual lo” a ni.
3.    Baptistu Johana chuan – Pathian beremno(Joh 1: 29)
4.    Heng bakah hian mi a tihdam thu te, tlachham leh pachhiate a khawngaih ziate, sual ngaidamtu a nih zia te leh mipui tam tak tana thilmak (miracle) nasa tak a tih ziate pawh sawi sen loh chanchin kan hmu.
5.    Sakhaw rawngbawltu leh Juda Upa ten nasa taka an do rawn a, thu hretu derte nen an puh chhiat lain Rome sawrkar aiawh rorelna hma a a din mek laia Pilate-a Nupui in a lo hmuh ve dan chuan – MI FEL TAK tih a ni.{Kha mi fel tak chungah khan engmah tisuh” (MT 27: 19)}
6.    A hun laia a sawrkar rorelna a mipui aiawh roreltu Pilata meuh pawhin Isua a hmuh dan hi chiang takin tarlan a ni. “In hekna thuah khan he mi chunagah hian engmah sual ka hmu lo a ni. Heroda pawhin a hmu hek lo… thihna khawp meuhin engmah a ti lo ve… ka chhuah mai dawn a ni” (LK 23: 14-17)

He tiang mi, roreltu te pawhin a chungchang thu a, thiam lohna an hmuh loh – mi fel, sual reng reng hre lo, beramno ang maia pawisawi lo, etc ni mahse THI TLAKA NGAIH   a ni hi thil mak tawp a van ni em.

Mi sual, an phu reng vanga thiamloh chantirte pawh hian – thih hmabak rorelna an chunga a tlak mauh chuan na tiin an kun tlawk tlawk thin.
Illustrations:
1.
2.
Khawvel rorelna hma a thi tlak nih chu sawi loh, Pathian mi pungkhawm thinte zingah hian a tuate emaw hi kan bul a mi ten emaw kan chunga lung nih lohna hmutu ten – “ Mi sual pa/nu, tenawm pa/nu, bum hmang pa/nu,…etc” min tit a se. Heng mite hi thih ngamin kan bei duh hial ang. A chhan chu, kha min puhna kha a dike maw dik lo emaw, mi pangngai nia inchhal vet e tan chuan A NA a ni.

Lal Isua erawh hi chu a chunga rorelna a tlak mek lai hian, “ Beram no a hmul mettu hma a a ngawi reng ang khan…( ), he mi thianghlim, sawiselna tur reng reng nei lo hian, a thiamthu a sawi lo va, a nihna ni hauh lo chu a nihna a pawm a tul avangin THI TLAKA NGAIH  a ni ta a ni.

Ngaihtuah chian poh veleh hian a mak a, mi fel, thiam lohna nei lo THI TLAKA  ngaih a nih maina dan hi eng vang nge ni ang? Tih zawhna hian a zui lo thei lo.

A chhanna chu “har lote” amaherawh thlarau puina tel lova, lung si taka pawm thiam harsa tak mai si hi a ni a. Chu chu eng dang ni lo vin…
Mi sual, tawmkai lo,… Pathian rorelna hma a, thiamthu sawi tur pakhatmah nei lo, THI TLAK DIK TAK  ‘nang leh kei mah vang’ a ni.

A chunga rorelna zawng zawng hi – Anchhe dawng, misual, nang leh kei aiawhna kha a ni (Is 53: 5)
Kan pawm emaw pawm lo emaw, Anchhe dawng, thi tlak, khenbeh tlak, nuihzat leh deusawh tlak, mi dangte chil chhak hlawh tlak lek kha KEMAH/NANGMAH CHIAH  kha ka/I ni a.

Khawvel rorelna hmaah ni lo vin, Pathian rorelna hma a, THI TLAK dik tak zawka pawh “NANG LEH KEI HI” kan ni. A nihna takah chuan, kan kiang amite hnen atang hian – Mi sual pa/nu, tenawm pa/nu, bum hmang pa/nu, tlaktlaina nei lo pa/nu, etc tihte pawh hi hlawh I la, heng hi kan nihna chiah chiah zel a ni.

Mihring hlui zia-ah hian beisei tlak reng a awm lo va. Chutiang khawpa lak tlak loh ka/I nih avang chuan, he silfen hi Lal Isuan ka aiawh a  inbelin, Mi fel, sualna reng reng nei lo khan  ka / nangma aiawhin – THI TLAK A NGAIH A LO NI TA A NI.

Ii Kor 5:21 – “ Amah-ah chuan Pathian felna kan lo nih theihna turin, sual reng reng hre lo chu Pathianin keimahni avangin sualah a siam” ta a ni.

Baraba, kei misual ti zalen a, Mi fel Isua Krista –khenbeh a awm hi, ka aiawhna, Pathian hmangaihna luang chhuak dik taka van ni em (Rom 5:8).

Lalpa chu fakin awm mawlh rawh se.