Note" He thuziak hi 'Baptist Today' Editor Pu KMS Dawnga (Upa) min sawmna avanga ka ziah, Dt. 16th (Sun), Aug, 2020 issue-a a tihchhuah nghal nghe nghe kha a ni a. Ka blog-ah hian kan dah ve hrim hrim a ni.
Thupui atana kan hman hi Paula tawngkam, “Ka chak loh apiangin a ni ka chak thin ni (2Kor12:10b) tih atanga lak a ni a. A nihna ang ngau ngaua lak chuan thu inkalh anga ngaih theih, mahse dikna nei leh thu awmze ril tak nei si a ni. He tiang ang tawngkam hi paradox emaw paradoxical statement tiin an sawi thin a. Bible-ah hian tam tak a awm a, Isua pawhin zirtirna hmanrua (teaching method) atana a hman tangkai fo zinga mi a ni. Paula’n he thu a sawi chhan kan chhui vek dawn chuan a sei dawn a, chuvang chuan thupui atanga zirtur tha awm ang angte a hnuai ami ang hian lo tarlang ta i la.
1. Paula chak lohna hi enge?
Paula chak lohna hi a dik ber hriat a har hle a, tawngkam hnih khahat emaw leka kan dah dawn chuan, a chak lohna chu; a nuna thil danglam thleng - a nun kal tluang tibuaitu, a chhungrila indona thlen thei, thil danglam lo thlengin hun rei lote chhung atana a tihbuai ve zawkte an ni tlangpui thin.
Paula chak lohna chungchang thu kan tarlan apianga kan tarlan hmaih hauh loh tur thil pakhat awm erawh chu – Heng a nuna thil danglam thlengte hian Paula hi an thunun hlen ngai lo va; ‘chaklohna’ chakna leh thiltihtheihnate chuan an chelh bet ve tak tak ngai lo tih hi a ni. Tin, Paula chak lohna hi – inthlahdahna leh dawngdahna te, thil sual tih, adt lam a ni ve lo. 2 Korinth bung 11 & 12-ahte hian tarlan an ni a, chungte chu;
i) A hnena Pathian inpuanchhuahna, hriattirna a dawn chu a nasat em avangin, a inngaihhlut lutuk lohnan, a taksa-ah hling pek a ni (2Kor12:7).
ii) Krista avangin – chhiatna te, neksawrna te, tihduhdahna te, hnawhchepnate a tawk fo va. Chung thilte (leh thil dangte pawh a ni ang) chuan ‘rilru leh taksa lama chak lo (infirmity) angin Paula hi an siam thin (2Kor12:10).
iii) Tirhkoh anih avanga tuarna namen lo a chunga thlengte a awm bawk a- thawhrimna nasa tak, tan ina tan, thi lek leka Judate leh Rom mite laka vuakna hleihluak tak (vuak 195), lunga den, lawng chhiatna vawi thum, zan khat leh ni khat tuifinriata awm, khaw kar kawng zinna hahthlak, luite laka hlauhawmna, suamhmangte laka hlauhawmna, a chipuite laka hlauhawmna, Jentailte laka hlauhawmna, khawpuia hlauhawmna, thlalera hlauhawmna, tuifinriata hlauhawmna, unau lerte zinga hlauhawmna, thawhhahna leh thawhrimna, vawi tam tak mut hilh theih lohna, riltam leh tuihalna, chawn ei tur neih lohna, khawsik, saruaka awmna, kohhran a ngaihtuahna avanga delhtu (2 Kor 11:23-28) a tuar bawk a. Hengte hi hun rei lote chhung atana ‘Paula chak lo zawk dinhmuna dah thintu’ Paula’n ‘chaklohna’ (infirmity) tia a vuah (2Kor12;10) an tih theih ang.
2. Eng tin nge a chak thin?
Rom15:1-ah tih loh chuan Paula hi ‘mi chak’ angin a insawi ngai meuh lo. Chak lo leh hlauvin, nasa taka khur chungin (1Kor2:3) tih te; Kei ni zawng kan chak lo va (1Kor4:10), chak lote hnenah chak lo angin (1Kor9:22), ka chak lohna lo chu mahni ka inchhuang lo vang (2Kor12:5), kei mi thianghlim zawng zawng zinga te ber aia te zawk (Phil4:22), mi sual ber ka nih hi (1Tim1:15), tihkoh zinga te ber…tihkohva vuah tlak loh (1Kor15:9), tih leh a dangte chu amah leh amah a insawi thin dan zawk a ni. Amaherawhchu, Paula hi ‘mi chak’ em em a ni a. Mi chaka siamtu erawh amaha awm reng thin ‘Pathian Thlarau’ a ni. Chu Pathian Thlarau, amaha awm, a chakna thuruk ni bawk avang chuan – “Ka chak loh apiangin Pathian Thlarau a lo chak thin a, kei chu chak thei ka ni lo” a ti talh lo va; a chakna thuruk Pathian Thlarau chakna chu ‘a ta, a chaknaah pawmin’ “Ka chak loh apiangin a ni ka chak thin ni” a ti mai a ni.
Chak lohnain Paula a tihchak hlauh dan chu a hnuai ami ang hian lo tarlang i la;
i) Chak lohna, chak lo anga awm tir thintute hian, hun rei lote chhung atan Paula hi han phuar ve bawk thin mahse, an phuar hlen thei ngai lo (2Kor4:8-10).
ii) Phuar hlen chu sawi loh, Paula hian a tih tur a thulh ngai lo va; hmasawn a thulh phah lo (Phil3:14).
iii) Chak lohna hmuna daha a awmin Paula hian Pathian fak a thulh lo (Tirh16:25).
iv) Chak lohna chu a lawman siam saktu an ni (2Kor12:10).
v) Chak lohna chu a tan Pathian inpuanna hmanrua leh a thiltihtheihna tifamkimtu an ni (2Kor12:9).
Hengte avang hian Paula chuan, “Chhuang tur ka nih vek chuan ka chak lohna lam thilte a ni ka chhuan ang” (2Kor11:30) a tih phah hial a. Chak lohna a chunga thengte hi ‘a chhung nunga awm’ Pathian Thlarau avangin ‘a chak zia tilangtu’ an ni hlauh thin a ni.
Hhripui chakna – chak lova min siamtu- kan chakna lan chhuahna tur:
Tunlai hripuiin mimal leh kohhante min nghawng dan leh ‘chaklohna hmuna’ min dah hial dan hi tlema zawng lo tarlang i la;
i) Ringtu nuna thil pawimawh ber zing ami Pathian chibai buk ho thei lovin min siam a.
ii) Innhaih chilh (face to face interaction) a rem loh avangin, rawngbawlna dang nasa takin a ti thuanawp a.
iii) Rawngbawlna thil tih theih eng emaw awm bawk mahse, kan tih theih chin hian tawp chin (limit) a nei tlat thin.
Hengte leh a dang tam takte avangin mi mal leh kohhrante chu ‘chak lo’ zawk dinhmuna ding ang kan ni mek a. Mi thenkhat chuan; inthlahdah phah nan te, tih tur tih loh – tih loh tur tih phah nan te leh social media at chilh/hman sual phahnante paw’n, adt kan hmang hial awm e.
A tawi zawngin, kan nun hi kil hrang hrangah sawi chet ni mahse hei hi theihnghilh lo i la - Paula ti chaktu leh a chakna thuruk hi keimahnia awm ve tho anih avangin; hri kaihhnawih avanga lockdown tih vel hian, kan rinna leh kan thlarau nun hi a lockdown ve tur a ni lo va, chelh din rual kan nih loh zia Pathian ram thilpek report (BCM) atanga kan hre thei angin, kan mimal nun pawhin he ‘hun khirh’ hi Pathian chak zia leh a that zia a tawnhriat (experience) mawlh mawlh hun lo ni ngei rawh se.
Chak lohna chuan ti chak che se la, I chakna Lapa chu i nunah lo inpuang mawlh teh se. Amen!
