HARHNA THLEN CHAM

 (A LIAM HLEN DAWN TA SI A...)

A TO BUL:

1. Zo sap ten Zoram an lo thlen hnu, kum 12 zet a liam hnu; kum 1906 April ni 4-ah chuan Thlarau Thianghlim harhna ropui tak chu Mizoram pumah a thleng a. 

He harhna hian Mizoram pumah Chanchin Tha a tidarh nasa hle a; kohhranhote pawh ti pungin a ti chak a. Hmasawnna ropui tak thlentu a tih theih hial a ni.

2. Chu harhna thlen cham kum 100-na chu kum 2006 khan ram pumah kohhran hrang hrangin lawm tumin an inbuatsaih mup mup a.

3. Diltlang ABC chuan BCM rorelna sang ber Assembly-ah thlenin 'Harhna thlen cham - 4th April hi special day-ah puan ni rawh se' tiin. 

He agenda hi Bungtlang 'S' tualchhung kohhran atanga lo kal, an bialtu pastor, Thlarau Thianghlim-in a khawih nawnleh avanga harhna ngai hlu em em agenda, bial rorelnain a pass, chu mi hnua ABC-in a ngaihtuah chhunzawm tak zel a ni.

3. BCM Assembly 2005, Chandmary Lunglei-a nghah chuan special day-ah a puang ta a. 

Agenda move-tu hi Bungtlang S bialtu pastor la tuai angreng tak niin, Assembly-a a thu sawi vawi 1-na a ni nghe nghe. 

Tichuan, Assembly-in a pass takah chuan kum 2006 atang chuan BCM ni pawimawh zinga pakhat a lo ni ve ta a. Kum tinin calendar-ah a chuang chhunzawm ve ta zel a ni.

*PLANNING COMMISSION 2021 RAWTNA ANGIN SPECIAL DAY PAIH THEN A NI.*

BCM Assembly rorelna chuan Planning Commission rawtna angin BCM-in Ni pawimawh a hman thin chu a chhawk thlen ta a. Chung  a paih thente chu;

1. NCCI DAY

2. HOSPITAL SUNDAY

3. MARTARTE NI

4. HARHNA THLEN CHAM

5. RUALBANLOTE NI

BCM-in Special day kan ngah avangin a then-azar paih then a ni hi thil tih awmtak pawh niin a lang a. Harhna thlen cham pawh hi sunday-ah a tlak khat avang leh, harhnain eng emaw zawng taka a nuai ve tawhte tan lo chuan ngaih hlut har tak tur a nih avangin paih then zinga a tel pawh hi 'a awm lo hran lo' a tih theih ang. 

Kum lo awm leh tur atang chuan he hming - 'HARHNA THLEN CHAM hian lam rik a hlawh ve tawh ngai dawn lo niin a lang a. Chuvang chuan he ni lo zik chhuah dan emaw BCM-in kan hman tan dan hre chiang ber pawla inngai hian a thlahna chi khat atan 'he mi chungchang thu' hi kan ziak a ni.

TESTIMONY -2

He thuziak hi TESTIMONY - 2  tiin Fb ka wall-ah ka post tawh a. Serampore kan chhuahsan dawn tak avangin, Serampore chapter hi Testimony nena khar ngei ka duh a, Serampore-a kan ni hnuhnung ber Dt. 04.04.2021 (ester sunday ni bawk) niin fb-a ka wall-ah hian ka tlangzarh ta a ni. Ka blog-ah hian kan dah tha ve leh ang e.

........................

Kum 8 hma lama kan hotuten zirtir rawngbawl hna thawk tura serampore-a min tirh khan, “Engah nge kei kher?’ tih rilru pu chung leh chhan hrang hrang avangin ka rilru a hmin lawk thei lo;

 

1. Institution chu ‘thlaler’ hmun ang deuhah ka chan a. ‘Thlarau chet velna’ awm mang lohna hmun, in tur leh ei tur tha pawh awm lohna hmunah ka ngai a.

 

2. Institution-ah hian thawk ho thiam lo, inngeih lo, intai reng, inngaihsang lo tawn ka hmu thin a; chu chuan - kha tiang ang hmuna awm ve tur anga ka inchanin, min ti chak lo.

 

3. A pathumnaah chuan, zirtirna hnaah hian ka la inhmang ngai lo va, tawn ngai loh thil phur taka hmachhawn kha a lo awlsam lem lo a ni.

 

A tawi zawngin, chona thar ka hmachhawn chu pumpelh ngaihna a awm si loh avangin - rim tak, sunday pawh awl mang lovin ka tulpui ve ta a. Ka rilruah erawh chhanna ka hmuh mai theih loh ‘zawhna’ a awm reng a, chu chu; ‘Lalpa he hmunah hian eng ti turin nge min tirh? Enge min dah chhan?’ tih a ni. 

 

KA NGAHTUAHNA & THIL THLIR DAN THLAK DANGLAM A NI:

 

Pathian rawng bawltute chherna hmunpuia zirtir hna pek chu ‘a ropui bakah, a nihlawhthlak tehlul nen’ ka rilruin erawh ‘a amen’ hleithei lo ka tih kha. 

 

Hei bakah hian, ‘father of modern mission’ tia an koh William Carey-a rawngbawl hna chhunzawmna a nih bakah, Carey-a in sak leh a thih thlenga a chenna hmun CAREY HOUSE-ah kan khawsa nghe nghe a. Chungte pawh chu a hluta a ropui tehlul nen, ka rilru hmin turin an tlak chuang lo. 

 

Ka ngaihtuah thiam ber danin, ‘Nu leh Pate Pathian tih man, chumi avanga malsawmna kan chunga lo thleng’ ang bakin serampore rawngbawlna chu ka ngaihtuah thei meuh lo.

 

Amaherawhchu (kai tawi I la), kum 3 a lo inher chhuah tan atang chuan thil a danglam chho tan ta a. Rilrua zawhna awm ‘chhanna’ leh nunin a ruka a zawn chu ka hmu hmu chho tan ta a ni.

 

1. Kan zirlai (chhuak tawh)-te atangin, “Sir, he hmuna I lo awm hi keimah vang a ni, ka tana Pathian ruat, keimah avanga Pathian dah i ni”; “Serampore-ah hian nang hi awm lo la chuan, ka tan he college hi….” tih leh thu dang ka hriat reng tawh loh min hrilh ka tawng fo a. Zirlai 4 zet hnen atanga chu tiang thu ka dawn takah chuan, ka rilru-a zawhna awm ‘chhanna’ a ni thei ang tih ka ngaihtuah tan ta a.

 

2. Thlaler ang maia ka lo ngaih thinah khan ‘Lalpan ka hnenah thu a sawi fo' a. Chu chu khawi hmun pawha ka thinlung thlakhlelh ber a nih avangin ‘Lalpa min kan tharlehna’ chuan lungawi lo thei lovin min siam ta a ni.

 

3. Tin, Pathian rawngbawlnaah hian ‘mi tangkai, awm awl mai mai lo thin mi’ nih duhin ka tawngtai fo a, “Lalpa, nangmah leh I ram tulna avanga awm hle hle theih lohna hmunah min dah rawh” ka ti thin a. Tichuan rawngbawlna kan hma chho ve kha ka rim ta hle mai a; kum 2 ai rei zet chu sunday pawh chawl mang lovin ni tin dar kar 8, a chang chuan a aia tam pawh kan tul chho ta a. Chu chu ka tawngtai chhannaah ka ngai nghet hmiah a ni.

 

A tawi zawngin, heng a chunga ka thil tarlante hian rei lote chhungin ka ngaihtuahna leh ka thil thhlir dan a thlak tan ta a. Tichuan lawm mang lo tak chunga bul ka(n) tanna hmun, kum 5 emaw chauh kan awm theihna tur ni bawkah chuan kum 8 zet Lalpan min awm tir ta a ni.

 

HRIAT RENG TUR THIL THENKHAT:

 

1.Tarlan tawh angin, serampore hi Pathian ngaihsakna kan tem nawn awn awnna; a aw kan dawn thar fona hmun a ni. A 'aw' dawng thin mi nih tluka hlu hi Pathian mi tan a awm chuang awm lo ve.

 

2. Tum khat chu tuna VP ni mek hian 'best faculty family' thlan a rawt mauh mai a. Zirlai hoin dinning hall-ah an han thlang ta a! Mak tak maiin kan chhungkua chu thlan chhuahah kan tang ta tlat mai a. He thil thlen dan hi ngun taka chhut let thiamte chuan mak an ti thin a. A chhan pawh - tun hmain chu tiang thil chu college-ah a thleng ngai lova, tun hnuah pawh a thleng leh ta ngai lo a ni.

 

3. Fa nei thei tawh lo tur anga kan inngaih hnuin Lalpa’n ‘fanu’ min pe a; fa min pek belhna hmun a ni.

 

4. Kan fate nuna ‘chi nung’ kan tuhna hmun a ni.

 

5. Zirlai, zir chhuak tawh mi tam takte hnen atangin ‘rawngbawlna an luh chilh dan chanchin’ kan dawng thin a, hei hi ka ngai hlu em em thin.

 

6. Sulhnu pahnih khat hnutchhiah vein kan inhria.

 

7..Associate professor hi ka ni ve ngaiin ka ring lo. Mahse serampore college 'nomenclature' ka hmuh hnuhnun ber kha tih danglam a nih loh chuan; i) Kum 6 chin teaching experiance nei ii) Research paper pakhat tal national paper-a publish tawh... tihte kha ka paltlang hnu a nih ve miau tawh avangin AP hi 'official lem lo chuan' ka tling ve mai lawm ni ka ti (lol). 

 

TLIPNA:

 

Ram pawnah kum 10 kan awm hmain ram chhungah kum 10 rawng bawlin kan awm ve tawh a. Ram chhunga kan awm lai aiin, ram pawna kan awm chhung hian ‘Pathian chet velna’ kan tawng hnem zawk a. Nikum, 2020 phei kha chuan ‘Covid19 avanga khawvel buai kum’ a ni chungin, kan family tan chuan ‘malsawm ruahpui dawn kum’ ang hiala ngaih theih, kan theihnghilh ngai loh tur ‘kum tha’ a ni.

Pathianin min kan dan erawh ka share fo tawh a, chuvangchuan tarlang tawh lo I la. 

 

A tawp berah chuan; A tlanchhiatna leh lung lukhama a mutna hmun kha Jacoka tan ‘a nuna Pathian inpuanna’ a nih miau avangin ‘hmun chhinchhiah tlak’-ah a lo chang ta a. Chutiang bawk chuan, Amen ka pek hleih-theih lohna hmun kha, ka hnena vawi tam Pathian inpuanna a nih tak avangin; ka tan chuan he hmun, kan chhuahsan mek hi ‘hmun chhinchhiah tlak’ a ni fo tawh dawn a ni.