MIN NGAIHSAK FO TIH KA HRIA

(Luangliam Post)

Tukin (Dt. 21st, Dec, 2017) chu hla thluk, a thu ka hriat fuh chiah loh - "Min hriat reng thin vangin?" ti a ka hriat tlat hian rilru a luah reng mai a. Ka hla ngaihthlak zen zen loh, a thluk leh thu dang pawh chhunzawm ngaihna ka hriat loh hi a ni a. Humm, Humm, Humm... tih bak chuan sak ngaihna pawh ka hre meuh lo.

YouTube-ah kan en a. TBC-a (See - https://www.youtube.com/watch?v=A3nS_V3p-k4) leh Lalthlengliani ( See - https://www.youtube.com/watch?v=mvDISP8-eNo) sak a lo awm reng a. An va thiam tehreng em.

'Min hriat reng thin vangin?' ti-a ka hriat kha MIN NGAIHSAK FO TIH KA HRIA tih a lo ni a.

Ka Lalpa hi, "tunge maw ka nih a, ka chhungte pawh hi tunge maw an nih a min hriat reng thin hi le...?". Min hre satliah mai ni lovin, lei leh van a thuneitu, engkim chung a roreltu hian kei 'engmah ni lo, chhuan tlak nei lo, mi ngaihsan chu sawi loh, ka chhungte tan lo chuan ngaihsak tlak pawh ni lo' hi MIN NGAIHSAK FO a lo ni tih he hlathu hmang hian min hrilh thar ve leh ta a ni. Halleluiah!!!.

A chang thenkhat hlathu hi chu tun a ka awm dan leh hun tawn mek nen inlaichinna a neih pawh ka hre hran lo. Ka lungngai lova, tun hnai a ka letter hmuh pakhat erawh chuan 'min tilawm lo hle' tih mai loh chu rilru nawm lohna ka neih pawh ka hre lo. Mahse, chuti-chung chuan MIN NGAIHSAK FO tih min hriat thar tir hi Lalpa'n a la duh cheu niin ka hria a, ka tan hei hi a hlu em em a ni.

A ngaitha ve duh tan a link leh a thu hi kan dah nghe nghe ang e.

MIN NGAIHSAK FO TIH KA HRIA
(Lungngaih Ni leh Lawm Ni... tiin an dah a)

Lungngaihni leh ngui changni te hian
Lungngaih ni leh lawm lai niah hian,
Lal Isuan min ngaihsak ngai em?
Buainaten min chim, ka kawng a sei lua,
Ka lo chau ta, phurrit tak nen.

Aw, min ngaihsak fo tih ka hria,
Ka lungngaihin a tina;
Ngui chang ni leh zankhua rei hlauhawm hnuaiah,
Min ngaihsak tih ka hria.

Ka kawng a thim, hlauhawmin min bawm,
Lal Isuan min ngaihsak ngai em?
Ni eng a lo chuai, zan thim a lo hnai
Min vengin a lo hnai ngai em?

Thlemna dovin, ka bei a lo dawng,
Lal Isuan min ngaihsak ngai em?
Lungngaiin ka chau, chhantu an awm lo,
Zankhaw tlaitluanin mittui nen.

Leia lungduh ber ka then laiin,
Lal Isuan min ngaihsak ngai em?
Tuar rual loh lungchhia, thinlai min run hi,
A hriain a ngainep ang em?