UNIFORM CIVIL CODE CHUNGCHANG

Pastor Lalzarliana Khiangte

……………………………………

*Uniform Civil Code chu eng e?*

Uniform Civil Code in a kawh chu he tiang deuh hi a ni – India hi hnam leh sakhaw hrang tamtak chenhona a ni a. Hnam leh sakhaw tin chuan mi mal nun nghawng dan chi hrang tamtak; entir nan – inneihna dan, inthenna dan, ro khawm dan, inchhawm (adoption) dan, etc kan nei vek a; chutiang dan hrang nuai chu – UCC hian a nuai bo vang a, India khualehtui zawng zawng ten inang tlanga kan hman tur dan a a rawt chhuak tawh dawn a ni. 

He dan hi apiang a nih chuan Hindu, Muslim leh, Chriatian ten dan a hrang a hraia kan hman leh neih thin chu a bo tawh ang a, UCC chuan ‘dan thuhmun’(UCC) hmangin mi tin min hrut rual vek tawh dawn a ni.

*UCC hian engvangin nge Indiaah inhnialna nasa tak a thlen?*

Hengte hi UCC avanga inhnialna langsar a ni.

1.  *India chu sakhua leh hnam hrang tamna a ni (Religious & Cultural Diversity):*

India chu sakhua leh chin dan hrang tamna ram a ni a. Sakhaw hrang hrang – kalphung, chin dan, leh mi mal kaihhnawih dan chi hrang hrang tamna a ni. UCC hi a lo piang a nih chuan heng dan hi a thlak vek dawn a. Chutiang a nih chuan khualehtui tinte tana ‘sakhaw zalenna ram’ ni thin chu ‘a bo’ ngei dawnin mi tamtakin an ring a ni.

2.  *Thlem zawkte chanvo humhimsakna (Protection of Minority Rights):*

A duh lotute chun UCC hi hman a nih chuan hnam leh pawl tlem zawkte hi nasa takin a nghawng nghal dawnin an hria a. Mi mal nghawng dan hrang hrang sakhaw tinin an neih inphan kual duah, an nihna tarlangtu leh inrelbawlna hran/g an lo kalpui tawhte chu he UCC hian ti chhiain a nuai bo ngei dawnin an hria. 

He tiang dan (UCC) hman ai chuan; hnam leh sakhaw vawn hran nei mi tlemte te  dikna leh chanvo humhalh sak hi ‘hnam tam tak chenna India ram’ angah chuan a tha zawkin mi tamtakin an ring a ni.

3.  *Political Considerations:* 

UCC hi mi thenkhatin politick-a hamthat lak an tumna leh vote bank siam an tumnaah mi tamtakin an ngai.

4.  *Mipa leh hmeiichhia intluktlanna leh hmeichhiate dikna chanvo (Gender Equality and Women's Rights):* 

UCC duhtute chuan ‘He dan hi hman a nih chuan; sakhaw thenkhat huang chhunga hmeichhiate rah behna leh inen hranna - dan tesep tam tak awm thin chu a bovin, chu chuan hmeichhia leh mipa te inkarah intluktlanna a thlenin an ring a. Mahse, UCC duh lotute chuan, “Hmeichhia leh mipa inkara rorelna dik (gender justice) chu dan dinglai huang chhungah a awm thei reng a. UCC hian sakhaw hrang hrang te chin dan hnuaia hmeichhiate  dikna hi a ti khawlo vek zawk ang” an ti a ni.

5.  *Ram & hnam inpumkhatna (National Integration):*

Mi tamtak chuan UCC hian hnam inpumkhatna a thlenin an ring a. Mahse a duh lo lam chuan UCC hian ram leh hnam inpumkhatna a ti chhe vekin an ring.

*UCC  thatna leh that lohna (Pros and Con) lak tawi:*

i)  *A thatna (Pros of UCC):*

-  Khualeh tui zawng zawngte inangtlanga min hrut rualna tur a ni.

-  Hmeichhia leh mipa (gender) inthlauhna a ti bovang.

-  Thangtharte tan hamthatna nasa zawk a siam ang.

-  Ram & hnam inpumkhatna a thlen ang.

-  Dan dinglai reform ngai tawh lovin a thlak ang.

ii)  *A that lohna (Con of UCC):*

-  Hnam hrang inpawlhsawp nuaina ramah hian a taka kalpui theih loh tawp a ni.

-  UCC hi sakhaw zalenna ti chhe hlauhtu a ni ang.

-  Mi mal thil hote teah pawh sawrhkar (state) a inrawlh fo tawh ang.

-  Hman tak tak hi a hlauhawmin a hautak hle ang.

-  He siamthat hna atan hian hunin a la zir hlawl lo.

*Comments:*

1.  Union law minister ni thin leh Congress hruaitu hlun M. Veerappa Moily chuan – “Sakhua leh hnam chi hrang hrang inpawlhsawp nasatna em emna ram Indiaa UCC hman tumna awm hi thil tih theih loh tawp ang a ni” a ti a. 

2.  UCC hminga Sangh's Hindu Rashtra agenda hman tumna hi thil hlauhawm tak a ni: NCP

3. *Keima ngaihdan:*

BJP- MP leh Parliamentary Committee chairman – Pu Sushil Kumar Modi chuan “He dan (UCC) hi hman a nih pawhi, NE a huam ve lovang” a ti a ni awm e. Mahse hman a nih hrim chuan, Hindu majority ho idea/ideology, tradition, practice  nasa takin zeh a ni ngei dawn a. Chu chu sakhaw dang zawng zawng tan a him lo main i lovin, a hlauhawm a ni. He dan hian NE a huam rih lo a nih pawhin, next step atana hma an lak lehna tur chu NE region huam chhung tho a ni ang.

Mi zawng zawng *Hindu dan SAKEI(?)* hnuaia kan kun a, hrut ruala kan awm vek loh nan; zofa kristiante hi Lalpa hmaah tihtakzeta kan kun a, kan tawngtai a tul a ni. 

*I ram leh hnam a dam nan tawngtai rawh.*

___________________