AW BIBLE, AW BIBLE

Tun hnai khan kan department (Communication) bik leh library development-na chi khat atan Office lamin lehkhabu leina Rs. 17,000/- min pe a, Flipkart.com ah hian ‘cash on delivery’ –in (a lo thlen hun huna pawisa pek chawpin- online shoping a ni) a lo lei theih a, lehkhabu 13 emaw chu ka chah thleng ve a ni. Chung zinga lehkhabu thenkhat chuan a hnuai ami ang hian ka ngaihtuahna a hruai peng nasa hle mai.

 

Heng lehkhabu-te hi i lo thlir thuak thuak teh ang a.

1. The Road Ahead. Bill Gate-a, khawvela pa hausa ber ziah a nih vang nge a to fer fer hle mai Rs. 650/- man a ni a, phek 45 lek, kohhran beng/Thalai Entu ang leka chhah a ni. Phek mal 1 man hi Rs.15 vel tihna a nih chu.

2. The Church in Cyberspace. Victor Counted ziah a ni ve thung a,phek 63 a awm, a man chu Rs. 3724/- a ni a, a phek mal 1 man hi Rs. 60/- vel angin a chhut theih bawk ang.

3. Bible (Mizo Bible, ka chah zing ami erawh a ni ve lo). Hei hi phek 1240(a tawpa Map lanna phekte nen chuan phek 1250 vel a ni). Zipper awm hi a to deuh a Rs. 450/- velin kan lei thin em kha aw? Zipper awm lo phei chu Rs. 150/- emaw lek ten kan lei thinin ka hria! Zipper nei(kawm savun) man ang hian chhut ta i la, phek mal 1 man hi Rs.0.36p/- (Zipper nei lo hi Rs.0.12p/-) a ni.

POST CHHAN: Kan Bible hi chatuan nun min hruai thleng theitu, kan ralthuam, ringtute tan chuan kan engkima engkimte zing ami a ni i ti mai ang. A chunga lehkhabu 2 te hi chu Bible-a lehkhabu mal Isaia ziak ai pawha pan fe zawk an ni a. Mahni pocket money atanga lei ralah phei chuan tuman englai mahin kan lei duhin ka ring lo. Kan ban phakah pawh an awm hek lovang.

 

Amaherawh chu heng aia a let tam taka hlu zawk BIBLE erawh chu mi rethei berte pawhin kan neih zawh theih nan, mi zawng zawngin an chhiar phak theih nan tiang hian BSI in min hralh sak ta a  ni a. Kan lo va vannei em. A chung a lehkhabu 2 man hlutna ang hian lei tur ni ta I la, nei zo lo, chhiar phak lo kan va tam dawn em.

Kan dawhkan, bang kil a let mai mai; inkhawm changa kan lek chhuah ve zauh zauh, mahse a keu pawh kan keu that peih mang loh kha, heng entirna (khaikhinna) hote hmang hian (an khaikhin zo lo hle nachungin) a hlutna han chhut thar leh ta I la. Kan nunna hnar kaitu, kan ralthuam, kan ban phak renga a awm theih nana man man taka kan neih hi eng dang vang ni lovin “Lalpa khawngaihna kan chan’ ava ni em.

“Aw BIBLE ka Nunna ber, van kawng min kawhhmuh saktu, ka van ngaihlu em ve le… “ tih hla hi min ngaihtuah thar tir nasa hle.

I ban phaka Lalpan a hmanruate hmanga a chhawp sak che I Bible hi vawi eng zat nge I chhiar chhuah tawh? I kawmngeih em? I Nun hnaikaitu atan I hmang ve thin em le?