KA LUNG PHU TINRENG NEN LAM CHHIARA MIN VEN SAKTU

(TESTIMONY)

Dt. 22nd, Feb, 2019 (Fri) zan kan mu chu, zing lam dar 1:00AM velah kan mu tan thei tawk a. Muthilh tak tak erawh dar 2:00AM (23/2/2019) a ni hial ang.

Zing lamah chuan mang ka lo nei a. Ka mangah chuan thlarau(? )pahnih; a puma(body) tisaina a tuam reng reng loh pakhat leh a pakhat zawk mi pangngai anga awm hi; tukverh atanga dakin, huana an kal thla hi ka lo hmu a. Ka hmu tih an hriat chuan, min tihzam ngei tumin an lo let a. Chu chu ISUA HMING lam chungin keiin lo hmachhawn ka tum bawk a. Ring taka ISUA hming lam ka tum chu, a takah ka lo au chhuak a; chu chu ka nupuiin min sawi harh ta a ni.

LUNG, PHU FEL LO:

Tun hma kum hnih thum liam ta atang khan, ka muthilh hlan hian ka lungphu hi a chiang lo fo thin a. Chutianga ka awm chuan mang dukdak lo hi ka nei fo thin. Lungphu chiang zan lo chungchang hi hman deuhah ka sawi chhuak tawh a. Thla khat emaw thla hnih chhung hian ka taksa pum nghing lawih khawpin vawi khat a phu lawih thin. Eng hunah nge a thlen dawn hriat a ni lova. Mut lai, zan lamah ‘phut lawih’  hi a thleng chawk thin. Doctor-ah inentirin ka kal phah zauh zauh tawh a. amaherawh chu, doctor rawn laiin a phu duh si lova, a tihngaihna tak pawh a vang viau a ni.

Tun tuma ka thil tawn hi, he tiang anga lungphu fel zan lo ka neih nen hian a inrual a nih ka ring a. A chhan chu ka nupuiin min kaihthawh rual hian, min hrilh danin, ‘ka phu leh lawih’ a ni awm e.

KA LUNG PHU TINRENG MIN CHHIAR SAKA MIN VEN SAKTU LALPA

Ka nupuiin min sawi harh chiah chu John Newtona hla ‘KHAWNGAIHNA MAK MAWI LEH DUHAWM’  ami a thu then  then, ‘Hlauhna hmuna ka awm min hrilh, ka hlauh min heh sak ta” tih te, “Khawngaihna mak mawi leh duhawm, sual riangvai chhandamna” tihte hi rilruah a lo lang a. Ka thinlungah chuan chiang takin “Ka lungphu avang hian vawi tam tak mu hlum mai theiin ka lo awm tawh a…”. MT 10:30 kha lo lang nghalin, “…mahse, Pathian thu chuan ‘In samzaite lam pawh hi chhiar vek a ni asin’ a ti a, kei erawh chu, ka samzai chauh ni lovin, Lalpa hian ka lungphu, a phu tin reng nen lam hian min chhiar sakin, min ven sak reng thin a lo ni” tih hriattirin ka awm ta a. He thil ka han hre chiah chu, ka lawm lutuk hi dan rual lovin ka mittui a sur zung zung a; Ka bula mu ka nupui hriat lohvin ka hru ka hru ta mai a ni.

Ka mang chipchiar (a chung ami khi a chipchiar a ni hran lo) ka nupui ka hrilh hnu chuan, “Ngawi teh, Lalpa chungah hian ka lawm em mai a, tawngtaiin lawmthu kan sawi hial teh ang” tiin zing dar 5:00 AM velah chuan ka tho a. Lalpa min ngaihsak zia ka chhui letin, mittui hruk sen rual loh nen, a hmaa lawmthu sawi leh mai loh chu ka tan tih tur dang chuang a awmin ka hre lo a ni....

Ka inhriat dan chuan. ‘Keimahah hian, a khawi lai mah hi Lalpa Pathian chu sawi loh; ka nupui fanaute tih loh, ka mihringpuite tan hian 'han ngaihsaka han ngaihhlut tur' hi a awm ve lo reng reng a. Ka pian phung leh chawr chhuahna (family background) bakah, thiamna leh zirna lamah pawh chhuan tlak nei lo, tu tan maha ngaihsan tlak loh, hriatna tlachham leh mihring mihrinna chungchangah pawh hlutna sawi tur nei lo' ka ni. 

Mahse, chuting mi chu ni mah i la, leilung leh a chhunga thil awm zawng zawngte siam a, a chhunga thuneihna zawng zawng neitu; lalte lal, pathiante Pathian, mihring tana hriat phak rual loh khawpa ropui leh thiltihtheihnaa thuam chuan ‘kei, engmah ni lo’ hi min ngaihsak tlat a. Ka samzai tin chu sawi loh, ka lungphu, a phu tin nen lam hian min chhiar sak a, min ven sak tlat a ni’ tih ka ngaihtuah a. Ka lawm lutuk chu; theih ni se, ka theihna aia sang zawka Lalpa hnena lawmthu sawi kha ka duh a; ka mihring theihna piah lama a hming fak theih kha ka chak takzet a ni. Mahse, chu chu ka tan tih ngawt theih a ni si lo. Tichuan, ka theih tawk awm chhun ‘Lalpa ka va lawm em’ tiin Lalpa ka be ta mawlh mawlh a. Darkar chanve chhung zet chu lawm avang chuan Lalpa hmaah ka tap ta hliam hliam mai a ni ta ber e. 

'A lama rilru ka put reng theih nan’ a hmanraw mak tak hmangin Lalpa hian min kan thar thin a. Hei hi ka nun hian A NGAIHLU TAKZET a. Sernung reng reng awm lova khawlohna a ngaihdam sak, a hma hruai a, a tul hun apianga a dinsak thin 'kei chhuan tur dang nei lo' tan hian, Lalpa hi a thain, a hlu em em a ni.

Lalpa chu fakin awm zel rawh se. AMEN!

***(Zing lam dar 7:30 vela ka mu tha leh chu dar 11:00 AM ah ka nupuiin min kaitho chauh a. Kolkata huam chhunga College paliin ‘Join Faculty Seminar’ kan neih thin, kan College-in a dawn tur, dar 9:30 AM a tan tur chu ka lo mut bo hlauh thung a. Ka chhungte hnenah lo sawi lawk ni i la, tel hmanin min kaitho tur…tih ngaihna a awm tawh si lo…).