KA TANA PATHIAN THILTIH MAK THENKHATTE

(A sei deuh a, tin edit a la ngai hlek ang)

K.Lalzarliana

He thuziak File hmingah hian “MIRACLES” tih ka hmang thin a, Bible-a Miracles ang em chu ni lo mahse,’ka tana Pathian thiltih mak’ tih nan tal hian ka la hmang fan a ni. Ka hun kal tawhte ka chhuikirin Lalpa Pathian hian ka tan thil ropui em em vawi duai lo min tihsak tawh a. Heti ema min ngaihsaktu a nih avang hian ‘A Thilmak Tih’ beisei fo hi ka rilrua awm reng pakhat a ni.

P.G zir turin Dt.1^st, June, 2011 ah Madurai panin chhungkuain kan thawk chhuak a, Pathianthu zir pawh ni I la Institution/Accademic Field-a han zuan luh tak tak hian (ka lo experienced tawh) mizo-in ‘thlarau chetna/hnathawh/aw’ kan tih hi tawn fuh a har hle thin. Zir nasat luat avanga kan nun a ro tlawk tlawk loh nan ‘Beiseina Nung’ nen Lalpa thlir tlat duhna/tumna neih thain ka hria a. He hun chhung hian ka tan eng ‘Thilmak’ nge a tih leh dawn tih lo thlira chhinchhiah zel pawh ka rilruk ta a. Tichuan heng a hnuaia ‘Ka (n) tana Pathian thiltih makte’ hi ka lo ziak thei ta a ni.

HEI HI BUL TANNA A NI E:

A.       P.G zir tura ka inbuatsaihnaah chhungkuaa che chhuak tur kan nih avangin sum mamawh a na hle mai. Hetiang ngaihtuahnain rilru a luah reng lai hian tum khat chu Biak In 1-ah (BCM Lli Electriv Veng) ka  inkhawm a, chutih lai chuan ka mamawh zat tur chhut chhuakin tiang hian ka ngaihtuah a(Pastor tan inkhawm laia hetiang ngaihtuah daih hi a mawi lem lo viau nain);

-          Air Ticket atan                                                                  Rs.40000/-

-          Jamesa bungraw khul nan                                                 Rs.  9500/-

-          Laptop lei nan                                                                   Rs.35000/-

-          Jaira Admission etc.                                                         Rs.13000/-

-          Others                                                                               Rs.10000/-

-          TOTAL                                                                        Rs.100000/-(vel?)

             
               A tlem berah he ti zat (cheng Nuai khat vel) hi ka mamawh dawn a, engtin nge ka tih tak ang le….? Ka ziak chhuak dap a, a tihngaihna reng reng ka hre lo. He ti zat sum hi, kei Pastor hna thawk tan khawi ami mah beisei tur a awm lo….  A awm lo chauh ni lovin cheng nuai khat nei thleng tur hian ngaihtuah pawh ka la ngaihtuah chhin ngai lo. Mahse, he zawhna chhan harsa tak hnuaiah hian tihian ka ziah chhunzawm ta ngawt a…..!

ANS: ‘Heng ka mamawh zawng zawng hi Lalpan min ngaihtuah sak mai teh se…’ tiin….

            Dt.20^th,Apr,2011 ah Bial kan chhuahsan a, he thu ka ziah tan ni hi 28^th,May,2011 a ni.Vawiin thlenga Pathianin amite kaltlanga khawngaih thilthlawnpek min dawn tir hi…(mite tan chuan thil hote pawh a ni thei), ka(n) tan chuan ‘Pathian Thilmak tih’ tih loh rual a ni lo. Lalpa hnenah chauh tih lovah chuan ka tlakchham leh mamawh hi ka thlen reng2 lo. Mahse he tiang hian amite kal tlangin min vur leh ta a ni.(Lalpa chu fakin awm rawh se).

Chungte chu he tiang hian tarlang ta i la;

1. Bial (Bcm Bungtlang Pastor Bial) Chhuah Hmaa Kan Dawn Te:

-          BCM Keitum                                                                    Rs.300/-

-          BKHP Keitum Unit                                                         Rs.100/-

-          TKP Keitum Unit                                                             Rs.100/-

-          Upa Hruaia & Family                                                       Rs.200/-

-          BCM Khawnglung                                                           Rs.500/-

-          BKHP Khawnglung Unit                                                 Rs.1000/-

-          Pu TK-a & Family                                                            Rs.500/-

-          BCM Rawpui                                                                   Rs.1000/-

-          BKHP Rawpui Unit                                                         Rs.1000/-

-          TKP Rawpui unit                                                             Rs.1000/-

-          BBC(Bungtlang)                                                              Rs.2500/-

-          TKP BBC Unit                                                                 Rs.1000/-

-          BKHP BBC Unit                                                             Rs.1000/-

-          BMP BBC Unit                                                                Rs.500/-

-          Bial Executive                                                                  Rs.1000/-

-          Bial TKP                                                                           Rs.1000/-

-          Bial BKHP                                                                       Rs.1000/-

-          PaChawia(RawpuiUpa)                                                    Rs.500/-

-          Pu Hminga & Family                                                        Rs.500/-

-          (kan fate - Jaira te Unau pai neuh neuhtute kan tarlang seng ta lo…)

2. Chawngte  Atangin:

- Mama & A-u(ka U te)                                                    Rs.20000/-
                                                                   (Air ticket man tur, Athen azar..)

- Mama bawk                                                                    Rs.500/-

- A-u bawk                                                                       Rs.3000/-

- Pu Hminga(SK-CWTE)                                                 Rs.1000/-

- Pu Kiana(R.O)                                                               Rs.1000/-

- Pa Zauva(S.A)                                                                Rs.200/-

- Nl Usangtei                                                                    Rs.100/-

3. Lunglei Atangin :

- Ka Ni-Lalengi(L.O)                                                       Rs.1000/-

- U Muani (Mangengi U)                                                  Rs.2000/-

4. Pangzawl Atangin:

- Pa Zika                                                                           Rs.10000/-

- Pazika bawk                                                                   Rs.1000/-

- Ni Niani                                                                          Rs. 200/-

- Pu Lawmawma                                                              Rs. 500/-

            Heng thilpek kan dawnte avang hian ka thla 2 hlawh ka save thei a, chungte nen chuan cheng nuai khat a tling thuak a ni. Computer Laptop Rs.34000/- man ka lei thei a,Air Ticket(Rs.26500/-) ka cut thei a, thiante bungrua(kan chhawm tur-Rs.9750/-)ka khul thei a, Jaira Admission tur(Rs.13000/-) kan save thei a, kan mamawh zualpui atan engemaw zat kan la reserved bawk.

           Rom8:32 a kan hmuh angin- “Ama fapa ngei pawh zuah lova,kan zaa aia  petu chuan thil zawng zawng pawh a thlawnin min  pe tel lovang em ni? ” a tih angin Lalpa hian Amite tlakchham hriain kan mamawh a hun taka min pek hi a lo remti takzet2 a lo ni.

Lalpa chu fakin awm mawlh rawh se! 

B. LALPAN KHAWTHA MIN PE (Lalpan kan tan khawchin a tidanglam?):

            Dt.1^st,June,2011 ah Lengpui atanga thlawk chhuak tur kan ni a. Pangzawl atangin Dt.30^th,May,2011 ah Aizawl kan pan a, kan chhuah ni atang hian khua a cheng nitin ta mai. Thlawhnaa zin tum kan ni si a, thlawhna cancel/delay a awm hlauh chuan sum tamtak kan seng thlawn dawn tih a chiang reng mai. Mi tam takin min hlauhthawnpui hle bawk. Mahse kan tawngtaina avang leh kohhran ho ten min tawngtai sakna avangin ka thla a muang tlat thung. Thawhleh ni tlaia ka tawngtainaah chuan, ‘Lalpa, naktuk kan zin chhuah ni tur a ni ta a, khawvel kalphungah khawcheng reng tur pawh ni se, keimahni avang chauh pawin khaw chin hi a inthlakin, khua a tha ngei ngeiin ka ring tlat. A chhan chu I mi-te kan tawngtai a, kan dilna hi I tihlawhtling ngei ang tih ka rin avangin…’ ka ti a. 

            A zawm zatin ruah hi ni 3 chhung a tla tawh a, mahse ka tawngtai zawh chuan kan Nu hnenah, ‘Naktuk chu khawvel kalphungah khawcheng reng tur pawh ni se, keimahni avangin Lalpan khawchin a tidanglam ang’ ka’n ti ngawt a. Pathian mite tawngtaina hi tawng satliah a ni lova, a hmangaihte au thawm, a hmangaih ten Pathian hnena kan mamawh kan lamna a ni tlat a ni.

            Zan lam thlengin ruah a la tla reng a, a hma zawng pawin a sur a, a tuk maia khaw tha beisei chu, beiseina danglam tak a ni ve hrim hrim. Mahse, a tuk khua a lo var a, ka zing tho kan hawi vel a, Ruah a la tha seng seng reng a, mahse khawtha Lalpan min pe dawn tih hi ka chiang tlat ani. Kan chhungkhuain kan tawngtai leh a, Lalpa hnathawh kan lo thlir (nghak) ta ringawt mai a ni. Zing dar 10:00 a lo ri a, ruah a han tan ta 11:00AM a nih phei chuan khua a lo thiang vuk tawh mai. Lalpa hi chu a va tha thin em. A ruktein Lalpa hnenah lawmthu ka sawi mawlh mawlh a. A thil min tih sak avang hian Amah fak lo thei lovin min siam leh ta a ni.

            Thlawhna kan chuan lai chuan vai leh hmelhriat loh, thlawhna khatin thlawhna chhungah kan chuang thap a, chutih laia ka rilru a awm chu – ‘Khawtha tak hnuaia harsatna awm lova kan flight thei hi heng hnamdang leh hmelhriat loh tamtakte hian an zingah ‘Pathian mi’ a tel vang tih hi an hre miah lo’ tih hi a ni mauh mai!

            Tichuan, khaw tha tak hnuaiah kan zin a. Thlawhna a hun takah lo tumin, a hun takah kan thlawk chhuak thei a, Calkutta atanga Chennai kan pan lehnaah pawh harsatna nei miah lovin a hun takah kan thlawk chhuak leh thei ta a ni. Lalpa hian kei leh kan chhungkua, engmah ni lo, ngaihsak tlak loh, mi tawmkai lo leh chhuan tur nei ve reng reng lo hi min ngaihsak tlat a, min hruai thin dan ka chhui kir hian ‘Ka phu mawlh lo…’ tih hi ka ngaihtuah thin a, phu lo chung chunga min ngaihsak tlat si hi kei leh kan chhungkua tan hian a ropui takzet zet a ni. Lalpa chu fakin awm zel rawh se.

C. TANPUITU LALPAN MIN PE:

            Madurai-a ka kal hmasak ber tum hian Chennai atangin Bus-in ka kal a, ka chuanna kha AC Bus a ni bawk a nuam ka ti hle a ni.Tun tum, chhungkua a Madurai pana kan kal pawh hi ‘Bus bawkin kal I la, a awlsam bawk nen, chhungkua chuan nuam kan ti ber ang’ ti rilru chungin kan inbuatsaih  a ni. 

            Chennai Bus Tarminal kan thlen chuan rin ang reng rengin thil a awm thei ta lo. Darkar thum zet kan thut/nghah hnu pawhin Madurai pan tur reng reng kan hmu thei lo. Naupangin engmah an ei duh bawk si lo (ka fate kum 5&4), rilru a mangang ru hle tawh mai. A ngaihna hre lova kan thut reng lai hian Tamil pa pakhat kan kiang velah awm ve reng a awm a, a inchei dan atang chuan Pa mawl ve tak hmel a pu nghe nghe.Tamil bak thiam a neih loh avangin (a hnu zeal a lan dan) kan inbe pawp lem lo a; mahse kan awmdan leh chetla vel atangin min lo chik ru reng tawh a ni ngei ang. Darkar 3 ai rei kan nghah hnu chuan Bus hlui lam tawha Madurai tih intar chu kan hmu ta a, zaizir chungin theih ang angin ka va zawt chiang a, a tawpa tawpah chuan Bus chhuingah bungrua kan thiar lut thei dawn ta.

            Tamil pa khan nau nawi nen indaih lo taka kan inthiar a hmuh chuan keimah aia bawr zawk mahin kan bungrua chu min khai sak ta. Chutihlai chuan, Bus conductor-in kan bungrua ngah zia a hmuh chuan a duh aiin a tam a ni tehchek aniang chu, chu tizat zat bungrua bus chhunga ken chu a remti leh ta lo. Sap tawngin a biak theih si loh, Tamil bak thiam a nei bik si lo, a tihngaihna reng ka hre leh ta lo. Kan bungrua khaitu Tamil Pa khan kan dinhmun a hriat ang ang a sawi a ni tehchek aniang chu eng tin tin emaw Bus chhungah chuan kan inthiar lut thei ta a. Kan thutna tur hnuaiah min rem sak vek a, kawng lakah zunram thiar tur leh chawfak tura Bus a din apiangin zaizir-in min hrilh a, Madurai kan thlenin bungrua zawng zawng min unload sak dap a, taxi min koh sak a, zan dar 12 velah Kan thlen tumna hmun Tamilnadu Theological Seminary (TTS) campus bul Hotel-ah riak turin kan intifel ve ta hram a ni(Kan fate nen hian engmah an ei duh miau loh avangin chaw chuan thum kan ei lo a ni).

            He kan thil tawnah hian fel tawk lo intihna ka nei lian hle a, tawng lama harsatna kan neih vang a ni bawk – kan chhuk ruala chhuk, kawng tluana min pui tur leh min vengtu ang hrima Lalpan kan kianga a dah kha Tamil Pa kha ‘tunge a nih, khawi lam mi nge, enge a tih dawn?” chanchin reng reng zawhna chang kan lo hre lo. Mangang taka a ruka kan awm lai khan min tanpui tur a lo awm remchang kha engdang vang ni lovin “Lalpan a mite min ngaihsak zia tihlanna hmanrua atan min pek a ni” kan tita ngawt a. “A hmelin puak tibik lo mahse, kan tan chuan Pathian vantirhkoh” a ni ber e. Ngaihtuahawmin kana wm tawh lo ani tih a chian hnuah chauh min kalsan a nih kha. Immanuela, ‘kan hnen Pathian awm’ thiltih tih phal loh chi rual kan tan chuan a ni lo.

D. KOHHRAN HO TAWNGTAINA LALPAN A CHHANG:

            Thla 4 lai Maduraia kan awm tawh hnuin a chhan hriat tur awm si lovin ka taksa a rawl a, ka chip atanga ke hmawr thlengin na lo lai a awm lo. Min phuar tlata ka hriat avangin thawmhnaw hak pawh hnawksak ka ti a, lehkha zir ka tul tehlul nen chawlhkar khat chhung chu engmah ti peih lovin in-ah ka tawm sen reng mai ani.

            Zoram lam chhungte nen kan inbe pawp reng a, ka nuamsam lo tih an hriat pawh hian min ngaihsak hle a, tihtheih erawh an nei lem lo. A kar khatna tur sunday a lo thlen chuan ‘he tiang renga awm ai chuan naktuk(thawhtan) chuan inentir I la, investigation pawh uluk deuhin tih tir law law I la’ tiin zan lamah kan nupa-in thu kan titlu ta a. Zanriah kan ei kham hlawt ang tihin(Zan Dar 8:00-8:30) Phone a lo ri ral ral a, kan han pikup chuan ka Nu(chawngte) a lo ni a, “I dam theih nan Kohhran ho thahnemngai(a tikher) takin an tawngtai a, zanin inkhawm ban tawngtainaah pawh(zan tin Biakinah a thei apiangte an tawngtai thin) I pualin Kohhran kan tawngtai” tih thu min rawn hrilh a ni.

            Thawhtan tuk ka tho chu mak tak main ka dam ta hle mai. Mangengi hnenah ‘tukin ka tho chu ka dam hle mai, ka taksa na pawh a awm tawh lo. Mahse fimkhur thuhlaah inentir chu thulh lo I la a tha ang’ ka ti a. Breakfast eizawh dar 10 velah “Mission Hospital’ lam kan pan ta a ni. Tlai lam dar 4 vel thlengin ka zun, ka tisen ka pumpui leh kawchhung lam investigation tiin Hospital-ah kan awm a, result chhuak hmasa apiangah a tawp thlengin; Doctor ten –“I tha, engmah natna chhan tur a awm lo” an ti tlat zel mai. Mak kan tirilru hle a, mahse ngaihtha takin kan haw a, Kohhran hote min tawngtai sakna tih loh kha chu ka dam tak chhan puh tur reng kan hre lo. A tira ‘Mak’ kan tih pawh kha ‘Mak’ kan tita lo, a chhan chu ‘Kohhran hote min tawngtai sakna avanga Lalpan a tihdam tawhah hian Doctor ten engah nge sawisel tur an hmuhchhuah tehlul ang ni’. Kohhran/Amite tawngtaina hi dilna/tawngtaina satliah a ni lo, a hmangaihte dilna a nih avangin, Lalpa tan chhan loh theihloh tluk a ni. Kohhran hote tawngtaina ngaithlatu lalpa chu fakin awm rawh se.

E. MANGAN LAIA TANPUIVARTU HNAI RENG:

            2012, April thlaah kum khatna ka(n) zo a, thlahnih lai chawlh kan neih dawn avangin neih zawng zawng seng pawhin Mizoram lamah chhungkuaa haw kan rawt a. Madurai atangin Train-in Chennai thleng kal I la, Chennai atangin Kalkata tichuan Aizawl. Thawhna-a kal turin ticket pawh kan tifel sa thlap a ni. Kum khat lai mizo biak tur mumal pawh awm lohna hmuna awm kan nih avangin Nu ber leh kan fate chu an phur lawk em em a, kal hlan kan nghakhlel tlang ani ber mai..

            Phur leh thatho taka kan awm lai chuan, vanduaithlak tih tur nge kan hriat loh lamah Pathianin thil min zirtir tur a neih vang zawk? Kan kal hma ni 3 vel atangin Jaira – Kan fapa upa zawk chu khawsik luakin a tlakbuak ta tlat mai. Ticket cancel dawn chuan thlawhna ticket zawng zawng pawh cancel vek a ngai dawn a, a dang lak lehna khawp pawisa kan nei leh dawn nge dawn lo tih pawh hriat a nih loh avangin ‘eng em kan ti loving, Pathian rinchhanin kal ngawt mai ang’ kan ti a. Madurai atang chuan AC 2 (Train)-ah chhungkuain kan chuang ve ta tiai mai. 

            Chaw a ei theih loh avang leh luak reng a nih avang chuan Jaira chu a chau hle a (harh tha em em, a dam chuan awm hle hle thei lo a ni), mut zel zel bak thil dang ti peih lo khawpin a chau a ni. Hetihahmanah, zanlai vel atang chuan a kua a khawh tan leh ta. A rukin kan mangang ta hle mai. Damdawi neihsa tlem leh ORS kal dawna bur 5 vel ka lei erawh kan kawl hlauh thung a. Zankhuain kan fate ber(Tetea) tih loh chu; chhungkuaa Train-a kan zin hmasak ber tum chuan mut pawh mu thei reng reng lovin buaina namen lo kan tuar tlang ta a nih ber mai chu.

            (Lalpa a che dawn ta!) A tuk khua a var hma deuh zing dar 4 vel chuan Chennai kan thleng tan ta. Biak theih  awm ang ang hnenah ‘Airport hnaih berna hmunah chhuk kan duh’ tih thu hrilhin, ‘chenei kan thleng tan’ an tih atanga min 40 vel hnu chuan kan chhuk ve ta nge nge a. Mahse bungrua kan ngah lulai deuh a ni!. Suitcase lian tha lenglawng 1 (kan Nu nena kan thawmhnaw kan inkhung tawmna), a dang a tiatpui 1 (chhungte thil kan hawn sak kan dahkhawmna), tin Bag lian tha nelhnawlh (Lunglei a 2850 a ka lei Madurai a 950 an hralh), Bag dum dang sekrek hnawh khawmna atana kan ken tel (zin Bag pangngai tiat vel), leh Laptop Bag, Parcel 2 te a ni. Avai hian kan nu nen naupang kan kaih ve ve pahin kan zo tawk tura kan hisap a ni. Mahse kan fapa Jaira dam lo chu thut pawh a thut peih tawh meuh loh avangin, Bungrua KG 20 kan neih belh a ni ta ngawt mai.

             Train atanga kan chhuk chu, Bungbrua ka taksa a ka khai/piai tang theih zawng zawng ka lak fel hnuah; kan fa naupang zawk Tetea(Joseph lalnunsanga) chu ka Suitcase hnuh kuang lehlam chelh tiring ka kai(?) a, a bak bag dang la awm bakah Nu berin Jaira a paw bawk. Platform atanga kan inzui chhuak chu khua a la var lo tih kan hre thei a, vai chhawr tur pawh hmuh phakah an awm reng reng lo. Kan chhuk ruala chhuk vete kalna lam panin kan inhnuk chhuak ve ta ngawt a. Platform ke a kalna tur lah chu hmuh phak chen khawpa thui nimai hian ka hria a, kawng lakah vawi 3 kan chawl hman hial a ni. Kan chhuah ruala chhuakte pawn min kalsan vek a, kan hah tawngkhawng chu kan ding leh thin. Khua a la var lo nain, chutia kan inthiar/hnuk vel avang chuan thlanin thawmhnaw (kawr) zawng zawng a tihuh vek thei a, ka sawr thei hialin ka ring. 

            A tawp atawpah chuan kan chhukna lam side atanga kawtthler/station dang panna kailawn (step) chho thui angreng fa kan thleng ve ta hlawl mai. Mahse chauh namen lova kan chauh tawh avangin bungrua nena chu step kalkai chu atuma tum chin rual ani tawh lo. He tih laia rilrua lo awm hmasa ber chu, ‘Bunghruate hi a thiarin ka thiar ang a, helamah bungrua veng pahin an nufain an lo awm ang, mahse tunge step chhuahah khian kan bungrua min lo en sak ta ang…?’ tih a ni (he tih lai hian amaka makin train dang lo thleng atang chuan an lo inpangaw zial chhuak ruih ruih a ni ber, step tawp pawh chu mipui avangin kan hmu chang chang ani ber e).

             A ngaihna hre map lova step bulthuta minit 2 vel kan din reng lai chuan kan hnung lamah Train compartment dang atanga lo chhuak thar chun min lo nang leh ta ruih ruih mai! Kan chhungkua chuan mipui kalkawng ka dal titih tat lat mai. Mahse tlai ngai lo Lalpa chu a hun takah a mite tan a che chhuak thin… kan hnung lam atang chuan Tamil pa pahnih hian kan mangan zia leh kan bawr zia (kan fate avang pawhin?) min hmuh chuan kan bag hrawl hrawl chu la in ‘kal rawh u’(an ti a nih ka ring) min ti a, step-ah chuan min chhawm chho ta. ‘Airport kal tur kan ni’ tih ka hril a, Taxi lakna hnai ber min kawhhmuh tura hrilh nachang erawh ka hre tahauh lo mai. Kan din dawn hlek chuan min hui zel a, ‘kan hruai dawn che u a lawm’ (an ti a nih ka ring) tiin zaizir pahin min chhawm ta zel mai.

             Ringhlel hman leh ringhlel thei pawh kan ni meuh tawh lo, min hruaina an gang chuan kan mum mumin kan mum a ni ber tawh mai. Local Train-ah min luhpui a, thui tak kan tlan hnuin stand pakhat-ah min chhukpui ta. Kan fapa jaira chu kawthalo la reh hleithei lo kha a ni a, kan chhuk nge chhuk lo ‘ka ek a chhuak’ a lo ti ve leh, han ek tir maina tur chu hmunah chuan avan van gem! Tihngaihna kan hriat mail oh avangin rail kawng-ah platform atang chuan ka bungbut tir ang venvawn a, far hnih khat bak erawh a far ta chunag lem hlei lova!. 

            Tichuan min hruaitu pa chu kan zui kan zui a, lei hnuai atanga kan han chhuah chuan ‘saw tilai saw Airport chu a nih saw, tihi chuan ka kalsan tawh ang che u( a ti a nih ka ring- a zaizir pah)’ a ti a, min kalsan dawn ta. Lawmthu hrilh ngaihna reng ka hre lo, saptawngin vai chibai inbuk dan nen lama zizirin lawmthu hrilh sawk sawk pah chuan Rs 500 pek ka tum a, min hnar, Rs 100 tal tiin pek kan tum leh a- tihian min chhang ta ‘pawisa ka lak chuan ka tanpui che u  a ni nang, tanpui thei che u a ka awm hi ka lawm em em a ni’(a ti niin ka hria) a tita a, min kalsan ta a ni.(Kan fapa hi kalkata-ah Synod House ah kan thlenpui a, thawktu ten min buaipui-in a zan a zanin Doctor kan en tir a, a zia ta chauh a ni. Mizoram kan thlen chuan a zawi hle tih loh chu, a khawsil luak leh kawtha lo chuan a kian san ta. Tin, BCM mi leh sa kan ni nain keimah ang bawkin pawlah ramri kham imem an lo nei lo ve a, Synod Hose enkawltute hi kan fak thlawt a ni.)

            Chennai hi ka paltlang tawh tih mai loh chu; a englaimah hi hriat ka la nei mumal lova, chhungkua- bawr mangkheng lehnghal, fate dam lo chung bawk nen…ka Nupui fanaute kha ka va lainat hnuhnawhin, engvanga hetiang hi an chungah thlentir nge ka nih tiin ka va inthiam lo nasa tehlul em. Mahse ka chhui let a, vai pa 2 (a tirah 2 a tawp thlengin 1) kha nge ka fak dawn, min tanpui duhna nei tura an rilru hneh saktu Lalpa hi? A tulam ve ve pawhin fak an phu ani. Amaherawh chu, Lalpa thatna leh min enkawlna hi a let tamtakin kan chhungkua chuan kan chawi sang zel dawn a ni. Hmelhrit pakhatmah awm lohna hmunah, manganna namen lo leh kal ngeihna kan hriat map lohna hmunah pawh ‘Min thlahthlam ngai reng reng lo’ Lalpa a ni a, ‘mangan laia tanpui vartu hnai reng, Lalpa Pathian engkim tithei, amite hma hruaia tanpui tura ban phar chhuak thin Pathian.’ a nih zia he thil hian min hriat thar thir leh a ni. He kan chhungkaw chunga thil thleng kan chhuikir apiang hian lungngaiha vui tak aruangin manganna namen lo kan tawh zawng zawngte kha kan chunga Pathian thiltih makte avangin kan lawman leh thlamuanna tizualtu an lo nita zawk a ni.

(Chhunzawm tur)                                                                                                   23102012(2:04PM)