ONLINE MISSION LEH ONLINE MISSIONARY

(Kohhran Beng September Issue ah chhuah tawh a ni)

    (Reviewed)

    K.Lalzarliana

         Zoram chhim leh hmar kila mite pawhin kan hriatthiam theih turin Online Mission/Missionary chungchang thu hi ziah kan tum ang a. Information technology lama Expart ka nih bik loh avangin hnuhma pawr lai deuh leh fuh tawk lo lai erawh a awm nualin ka ring. Khawvel danglam taka tunlai khawvel mihringte hnuk luttu Internet chanchin atang hian I lo tan dawn teh ang.

1. Internet :

         Internet chu ‘Computer network, Internet protocol suit (TCP/IP) hmanga khawvel pum huapa mi maktaduai tamtak thlun zawmtu’ hi a ni. Internet  tih chu technical term ‘Internetwork’ lamtawi (sawina)mai a ni. Khawvel puma internet hman nasat ber chu World Wide Web, “www” emaw “The Web” tia an vuah hi a ni a. 1969 bawr veIah  US-a Advanced Research Projects Agency (ARPA) in a duan(conceived) chhin atanga intan niin, a tirah chuan ARPA hming chawi hian  ‘ARPANET’ tiin an sawi thin. Internet (thumal) tlukpui, a sawina tawngkam/thumal tamtak a awm a chungte chu : HTTP (Hypertext Transfer Protocol), Static Analysis (Static Code Analysis), Intranet, Windows Workflow Foundation (WF or WinWF), XAML (Extencible Application Markup Language), Scripting Language, GUI (Graphical User Interface), Windowd Communication Foundation (WCF), Windows Presentation Foundation (WPF), Windows File System (WinFS) etc. a ni.

            Tun hma chuan computer expart te, engineer te, scientist leh librarian te chauhin Internet hi an hmang thin. In leh office hrang hranga personal computer kan tih ang pawh hi a la awm lo. Tunlai khawvelah thung erawh chuan hmun kilkhawr ber ber amite pawn Computer, Laptop, Smart Phone, P.Tablet etc. hmangtein internet hi connection kan neih dan a zirin kan hmang thei ta a. La hmelhriat ngai lo tamtak la awm bawk mahse, tun atanga kum 5 a aral leh meuh chuan, a bikin Zoram thalai zawng zawngte hian Internet kan hmelhriat vek tawhin a rinawm. Social network lar tak tak Facebook, Tuiter, Youtube, etc leh group hrang hrang sang tel takmeuh-ah thalai maktaduai eng emaw zatin ni tinin office work, hlimhlawp, hun khawhral, indawr leh mamawh hrang hrang tih nan hun tamtak an seng mek a. Mizo thalaite zingah pawh internet hmang lova nileng thei tawh lo mi 20000-40000 bawr vel chu englai pawhin kan awm hial tawhin a rinawm.



2.   Online chu enge a awmzia?

           Margaret Rouse hrilhfiah dan hi online hrilhfiahna awlsam berte zing ami a ni mai awm e, ‘computer network (internet) emaw device eng emaw ber hmanga midang nena inthlun zawm’ tihna a ni. Internet hmanga tuemaw midang thlunzawm tihna a ni bawk. Online sawina thumal(tawngkam) tlukpui tamtak a awm thei bawk  a, chungte chu:Virtual Area Network (VAN), 10-High-Day Busy Period (10HD busy Period), Graceful degradation, Soft Switch, Maximum Transmission Unit (MTU), Traffic Shaping (Packet S Dialed Number Identification Service (DNIS), WATS (Wide-Area Telephone Service), Mail User Agent (MUA), NBMA (Non-Broadcast Multiple Access) etc. tihte a ni.

         I computer emaw Smart Phone emaw hmanga Internet kaltlanga mi tuemaw I va thlun zawm khan ONLINE a ni a, online ah I awm tihna a ni. I thlunzawmna I tihtawp chuan ‘offline’ a ni leh mai. Kawng danga hmanna pawh a awm bawk, Committee meeting-a kan Agenda pakhat chu ‘Mission Field thawh thu’ a ni. Agenda anga thu sawitu apiang kha ‘online’ an ni a, online-ah kan awm tihna a ni. Agenda pen sana thil dang chanchin a kan pakai daih chuan ‘offline’ a ni leh mai. Mi dang tuemaw nena in dawr (communicate) tawn theihna hmuna va awm chanchin sawina a ni bawk.


3.  Online Mission chu enge ni ta ang?

           ‘Bru/Chakma Mission’ kan tih chuan, a awlsam zawngin – ‘Bru/Chakma zinga rawngbawlna’ tihnaah a ngaih theih ang. Hetiang deuh hian “Online Mission” chu ’nternet hmang ‘Online’ a awmte zinga rawngbawlna’ tihna a ni. Chu Mission chu hma tak tak dawn ta I la, tute hnenah nge Isua Krista Chanchin Tha rawng chu kan bawl ang?, rawng kan bawl sak/chhan turte chu tute nge, helam zawnga hmalakna tham tak tak a awm dawn em ni?

           A chunga zawhna pawimawh tak takte chhang tur hian, khawvel pum huapa Social Network lian zuala Online thinte hi I lo en chiang dawn teh ang.

S/No	Social Network	Hman tan hun (lunched)	Online zat (Thla bi-in)
1	Facebook	February 2004	750,000,000
2	Twitter	July 15, 2006	250,000,000
3	Linkedln	May,2003	110,000,000
4	Myspace	August,2003	70,000,000
5	Google+	June 28,2011	65,000,000
INDIA TOP 5 (July ni 10, 2010 a hmangtute)
1	Facebook	20.87 Maktaduai bi
2	Orkut	19.87 Maktaduai bi
3	Bharatstudent.com	4.4   Maktaduai bi
4	Yahoo!Pulse	3.5   maktaduai bi
5	Twitter.com	3.3   maktaduai bi

          Vawikhat thilthuah heng mi zawng zawngte hnenah hian chanchin tha kan hril ngawt thei lovang, amaherawh chu hetiang khawpa( a aia nasa zawk mah) mihring tam hi internet hmangtu khawvelah an awm reng a, online hmangin tu-tute emaw tal hnena chanchin tha hi a hril theih a ni.


4.  Online Missionary - eng kan tihna nge?

           BCM in missionary hrilfiahna kan neihah chuan – ‘Mizoram chhung leh pawna chanchin Tha la hre lote zinga Thu, thiltih leh Nun dan tha-a Isua Krista chanchin Tha hril…tute hi an ni’(BCM Constitution and Rules,238) tiin a sawi a, BCM Missionary te hrilhfiahna bik deuh a ni. Isua Krista chanchin Tha hmanga mi dangte kawng dik kawhhmuhtu, misual leh khawvel sual bawiha tang chhanchhuak tura Pathian chhandamna thu, thiltih leh nun dana hrilhtu te, kalphung dik lo emaw mihring inthliarna avanga tuar mekte chhanchhuahna hna thawktu, Pathian leh a chanchin tha avanga Pathian hnena midangte hruai hna thawk tura inpe emaw chutiang atana serhhrante, etc tiin a tawi thei berin a hrilfiah theih bawk ang.

Tichuan ONLINE MISSIONARY chu;
- Internet hmangtu {NETIZEN an ti bawk(citizen-khualehtui, Netizen-InterNet mi leh sa?) emaw
online-a awm} Isua Krista chanchin Tha hmanga midangte (online-a awm) kawng dik kawhhmuh leh zirtir tura inpe/inhmangte an ni ang.
- Isua Krista chanchin Tha Internet kaltlanga hriltute an ni ang.
- Online (internet) atanga Krista hnena mi dangte hruaina hna thawktute.
- Mi sual leh khawvel sual bawiha tang mekte chhanchhuak tura Pathian chhandamna thu online atanga thlentute an ni ang.
- Missionary rilrupu, mi dangte kawng dik kawhhmuh leh tanpui duhna rilru pu rana online thinte etc.( a tih theih bawk ang).

5.  Online Mission/Missionary hna tulna.

Information Technology lama hmasawnna chak lutuk hian tunah chuan ‘Cyber Church’ (Internet hmanga ringtu inthlunzawm Kohhran?) te hring chhuak in, Online Misasion Work te pawh kohhran/pawl thenkhat(eg: Mormon ho) chuan an lo nei daih tawh a. Internet khawvel lak ata  tunlai mihringte pawt ding zo tak tak  tur eng thil mah beisei tur a awm tawhin a rinawm loh. Kan inthiarfihlim san theih hauh loh thil hi a tangkai zawnga hman dan zawn a ngai a ni. Chuvang chuan, mi ten an tih avang ni lovin, a tulna avang zawkin helam zawnga rawngbawlna rilru kan sen hi a hun tawh lawm ni kan ti a ni.

BCM hian Mission field leh station 20 chuang kan nei tawh a, Missionary pawh 770 vel kan lo nei ta reng mai. Heng mi 770 te hian mahni hmun leh hnaivai amite hnenah tih loh chuan chanchin Tha hrilna chance an nei tlem hle ang. Chutiang bawkin kan Mission Field 20 chuang hlek tih lohvah hian BCM hian rawngbawlna chance kan nei tam lo tihna a ni thei bawk ang. Hei aia zau leh khawvel pum huap tak taka mission hna thawh theihna chu Online Mission hi a ni dawn a ni. He hna tulna hi eng tin nge kan hriat fiah theih ang.

i)  Chanchin Tha la dawng lo mi sang tamtak an awm,
A chunga table kan tarlan tawh ang khan, eng zat fakauva tam nge Internet Online-ah hian Krista hre lo mihring inhnamhnawih ang tih kan suangtuah thiamin a rinawm.

ii)  Sual bawiha tang chhanchhuah tul an tam.
Khawvel mihring maktaduai tamtak Internet lova khawsa thei tawh lote zingah hian sual bawiha tang Krista chanchin tha la hre ngai reng reng lo engzat tak awm ang I maw?.Thil sual tih duhna thinlung pu sa a, internet hmang hi an va tam dawn em!.

iii)  Kawngdik a hruai ngai tamtak an awm.
Mizo thalai-te zingah ringawt pawh internet lova ni vui liam thei lo mi sang tamtak kan lo awm ve ta. Kristian ni si - fuih ngai, nundan tha leh mawi zirtir mamawh, kawngdik zawh tura tanpui ngai, nun beidawng, hmeichhiat mipatna(sex) sala tang, mi awm tha duh lo, hliam chi hrang hrang tawk etc. kawng dik kawhhmuh leh hruai ngai an va tam em.

iv)  A tam thei ang ber Mission rawngbawlna-a inhnamhnawih tir nan a tha .
Mi tamtak rawngbawl tura pen chhuah rem lo, rawngbawlna rilrupu rawngbawlna tur leh rawngbawl ngaihna hre lo enge maw zat zirlai, sawrkar hnathawk, lehkhathiam hnahmu lo etc te zingah an awm. Heng mite a tam thei ang ber rawngbawlnaa hnim luhna remchang tak a ni ang.

6.  Online Mission hna - Missionary chu tute nge ni ang?

Kan hriatpui lemloh leh an mahni pawhin nia an inngaih mang loh laia online missionary hna thawk mek hi Mizo thalaite zingah tamtak kan nei sa reng tawh a ni. Christian Social Network Group tenkhat; Mizo Kristian Youth Forum- member 10,019 awmna te, Mizo Kristian Sharing- member 1,305 awmna te, Daily Bible- member 10,109 awmna te, Zoram TKP – member 2,452 awmna te, Mizo Kristian Thalai – member 2,376 awmnate leh a dang tamtakah online missionary (tia kan vuah) rilrupu hi an awm  sa reng tawh a ni.

Tichuan, Online Missionary ni duh apiangte chu hetiang mi hi ni thei se;
1.      Mi piangthar, Pathian tih takzetna thinlungpu, mi rintlak tute pawhin online missionary hna an thawk thei ang.
2.      Information technology lama tui, internet access theihna hmanrua nei leh a chung ami ang rilrupute.
3.      Sawrkar hnathawk, zirlai, lehkhathiam leh thiam lo, hnathawh nei leh nei lo, sumdawng, fulltime-a Pathian rawngbawl thin, Part-time pawha Pathian rawngbawlna a inhmang, Officer lian leh te, etc. eng mi pawh chanchin Tha avanga mi dangte Krista hnena hruai duhna nei leh tanpui duhna thinlungpute.

7.  Online Missionary-te chuan enge an tih ang?

1.      Internet kaltlangin a remchan dan ang zelin mite hnenah Isua Krista chanchin Tha (online-in)an hril ang.
2.      Mi dangte Krista hnena hruai duhna leh tanpui duhna thinlungpuin Social network hrang hrang a tamthei ang ber an thawh kual thin ang.
3.      Mite tanpui thei leh fuih a, an nun thlamuan thei Pathianthu a tam thei ang ber an post thin ang.
4.      Mi tupawh ‘chat’ pui theih turin an awm ang a, chu chu Pathian lama mite hruai leh fuihna remchangah an hmang ang.
5.      Kristian nun dan tha leh mihring nun khalh ngil thei thuziak a remchan ang zelin an post ang.
6.      Mi dangte awm dan dik lo leh mawi lo kawhhmuhin kawng dika hruai an tum ang.
7.      Thurawn pek ngai leh fuih ngai (online-a) an tawn fuhin Pathian rawngbawlna rilrupu ranin an tanpui thin ang.

8.   A tihhlawhtlin theih dan kawng a awm mial em?

Suangtuahna thil a ni a, thutaka kan lak duh leh duh loh chu a chhiartute thu thu ni se, Online Mission leh Online missionary tihhlawhtlin theih dan hi kawng hrang hrang atangin a ruahman theih ang. BCM a fulltime-a thawk ka nih avangin BCM behchhanin tiang hian I lo ruahman dawn chin teh ang.

1.      Mission Committee kal tlangin BCM Assembly-in Online Mission (Field) hi din se.
2.      BCM Website kaltlangin Mission Committee hnuaiah Communication Department nena thawk dunin(collaborate) he rawngbawlna hi a tih theih ang.
3.      Information technology lama expart, mi piangthar Missionary rilrupu leh rintlak mi 2 vel helam thawk/buaipui/kaihruaitu tur hi chhawr ni se.
4.      Online Missionary Policy felfai leh rintlak duan ni se. Missionary recognize dan kan neih sa hrulah BCM Online Missionary pawm theih chin a hranin siam ni se.Missionary dangte anga BCM Missionary-a chhiar vek erawh a har deuh ang.
5.      Tentmaking(puanin kaih) missionary angin in thlunzawm dan siam ni ve se.
6.      Internet hmang te( a bikin thalaite) zingah Missionary rilrupu tura inzirtir uar ni se.
7.      BCM pum huapa kan tuipui lo a nih pawhin, MTKP in (emaw) a chunga ruahmanna zulzui ang khian kengkawh se, thil huphurh awm niin a lang lo.


A tlangkawmna:

Mizote zingah pawh Social network lar leh tangkai sawi kim hleihtheih loh tamtak a awm a, Misual.com- member----------awmna te, Lawrkhawm.com- member 49831 awmna te, Mizo Thalai Titi- member 9,047 awmna te hi kan hriat tlanglawn deuhte an ni maithei. Kohhran mi leh sa, mi puitling tak tak awmna Group thenkhat; BCM Kaihhnawih Sawihona- member 1150 awmna te, BCM Mission Field- member1330 (Network Groups kan tarlante hi nitin deuh thawin an pung zel) awmna leh a dang tam tak nitin zantin-a online thin, thu leh hla nei lem lova silent reader/visitor anga tlawhtu thahnem tak nei reng leh mi thenkhat thiankawmna hmanrua ang maia hmang tangkai, chanchin thar leh thubenglut ngaiven an awm reng bawk. Kan chenna khawvel a awmreng chung hian khawvel dangah tunlai mihringte hi kan zuanglut chum chum a ni ber a, he khawvel danglam takah hian krista chanchin tha kan luhpui a, chanchin tha avanga kan in tah luh deuh deuh hi a tul hlein a lang.