ZUNTHLUM NATNA CHUNGCHANGA THIL INTHUP – II

Tute maw literature lama tawnhriat ngah intiin, para hnih khat emaw leka thu zial fel theih, khawi khawi atangin emaw thu fahrah te te  fawm khawma phek hnih thum lawiha sei thu an ziak kual chiam ang deuhin, thuhmahruai A & B atangin tan ve ngawt I la.

A. THUHMAHRUAI
1. Zunthlum chungchanga Dr. Biswaroop Roy Chowdhury thuziak ka fb wall-a ka dah kha remchan huna chhunzawm leh atana ka tih a ni a. Amaherawhchu, rin aiin whatsapp-ah nen lam a darh nasat tak avangin, a tira ka thil palzam luih, ka thu ziak famkim lo tak avanga thil pawi awm thei tur (ngaih kawih theih tur) ka hmuchhuak thuai a.
2. Mi tam takin an blood test result azirin ‘zunthlum natna vei reng siin an palzam palh thei’ tih hi.
3. 126 mg/dl hi WHO-in a pawm lai a ni a, tin 100 mg/dl hi American Diabetes Association (ADA) pawm leh India pawhin tehkhawng bera a hman ni awm tak a ni, Dr Roy-a sawi danin.
4. Tin, 140 atanga 126 leh 100 mg/dl a Cut-off panel-in an thlak danglam chhan ber ‘an mahni sawi dan’ hi kan va hriatpui ve tawh lo va. ‘126 emaw 140 mg/dl miin a thlen tawh chuan zunthlum veia kha enkawl a hautak tawh avangin 100 mg/dl hi tehkhawng chhiar tan nan hmang I la, mi tam tak tan invenna chance a awm ang a, tin a veite tan ralkhel dar khawn hma hi an inenkawl chhunzawm zel nan a tha’ tiin mihring hriselna hmakhua ngai takin an lo tidanglam pawh a ni thei a, chuvang chuan rintlaka ngaih tur mi thiamte ‘tehkhawng’ siam hi kan ngaih pawimawh lova, zunthlum vei reng siin a natna ngaihthah nan a hman si chuan mahni chunga meiling chhek mai kan ni thei....tih hi tarlan ngei tur ka tarlan tak loh kha a ni.

B. THUHMAHRUAI
Mi thuziak ka lo tarlang ve chhen leh helam thil tuipui awm taka ka awm chhan a awm a;
i) Assignment pawimawh em em tiin (Pathian thu lam, publish tur) hun ka hmang mek a. Tun thla chhung ringawt pawh hian phek 30 tling lo deuh ka ziak nghe nghe. Ngaihtuah ngut nguta hun ka hman thin avangin chawlh kar laka rilru tih thawl nan ka lehkhabu chah thlen thar 2 chu hman ka tum a ni. Dr. Roy-a lehkhabu lo pawh hi Dortor lar em em BM Hegde-a ziak, mizotawngin – ‘Doctor Hoin Medical School-a an Zir Loh’ tih ka la inchhawp ve ran a ni.
ii) Kum 3 hma lam atanga zunthlum natna buaipui tawh ka ni a. Doctor rawn reng chungin, thisen pawh test rengin a theih ang anga mahni inhai ven dan ka dap a. Doctor ka rawn tawhte hian ka lungawi khawp thurawn min pek loh avangin hei hi ka tih ngei a tul a, tichuan chhiar tur ka dap khawm alamah, ngaihnawm ka tih deuh deuhte ka han lawr khawm ta ngawt a ni.
iii) Mizo doctor hoin an lo chhiar fuh palh ang a, min khak ang tih ka hlau hle a. Mahse, Pathianthu zir lo pawhin Pathianthu khirhkhanpui pui an sawi thin a, tin kei ni’n kan sawi that duh loh JEDP hypothesis te, reduction & form criticism, inspiration, etc chungchangte venthawn nei lek lovin Pathianthu zir hlei lo pawhin an sawi ve tho tirilru chung zelin ka han tlak ta duah a.
iv) ZUNTHLUM Type 1 & 2 enkawl dam dan ‘D1D2C Diet’ a tih pawh hi ZUNTHLUM NATNA CHUNGCHANGA THIL INTHUP – III ah lo la sawi zel ka tum nghe nghe.
v) A ziaktu hian vanneih thlak takin copy right a hauh lo. Tin, hauh pawh ni se, India rama lehkhabu publish tam ber copy right ho hi ‘illegal right’, valid lo deuh vek an ni a, ka hlau tehchiam lo. “A bu chhung thua hnial kalhna a awm chuan District Court, Faridabad, Haryana -ah chauh tih tur a ni” tih erawh a tarlang kuau mai.

TAN DAWN I LA:
1. AQUARIUM ANALOGY (Sangha khawina tehkhin thu)

A inziak ang anga letling tawh lovin, a ngaihnawm tur zawngin lawr khawm ta I la…

He tiangin;

Sangha Aquariama khawi thinte chuan kan hria ang a. Aquarium kha sangha tan chuan a khawvel a ni. Ngaihsakin duat teh mah la, eng tik niah emaw chuan a chhunga tui kha a bawlhhlawh hun a awm thin. Chumi avang chuan sangha chu a lo dam lo ta a, tichuan in chhungkaw zinga dam lo I enkawl dan tur angin suangtuah ta I la, sangha dam lo chu doctor hnenah entir I rilruk ta a ni.

Doctor chuan lo en thuak thuakin damdawi eng emaw a chawh ang  a, ‘dam fel tur chuan hun eng emaw chen a duh ang, a… a tha chhunzawm ve mai ang’ a lo ti a. Mahse, a awmna tui kha a bawlhhlawh miau avangin ni eng emaw chen hnuah sangha chu a lo dam lo leh thin. Tichuan, tuntum a dam lo chu a hma ai mahin a lo serious ta a,  hun I  khawhral thlawn mai mai loh nan sangha dam lo chu damdawiin tha berah kalpui I rilruk leh ta a ni. Doctor chuan lo en velin damdawiina admit a lo rawt a. Tichuan damdawi thenkhat leh injection eng emaw a pekte chuan magic ang maia hna thawkin a lo tha chhuak leh ta a. Damdawiin ata I lak chhuah hnu chuan a hmaa a awm thinna aquarium –ah bawk chuan i dah kir leh ta a ni.

Ni eng emaw zat hnuah, a hma ai maha serious zawkin sangha chu a dam lo leh ta a. Tuntumah chuan general physician chuan specialist, diabetologist hnenah emaw a refer ta a. Tichuan test chi hrang hrang tiin diabetes a vei a ni tih hmuhchhuah a lo ni ta a. Zunthlum damdawi Metformin ni tin vawi hnih, dam chhungaa  ei tur a lo chawh ta a ni. Sangha chu doctor-in thurawn a pek ang apiang ti turin I fuih a. Mahse I theihna zawng zawng nen I ngaihsakna I tilang chung pawhin sangha chu a khawsik leh thin...

***He tehkhin thu atang hian enge kan zir chhuah ni ta ang? Sangha harsatna leh a dam loh leh thin chhan ber chu amah sanghaah khan ni lovin, a awmna tui bawlhhlawh kha a ngeih loh vang zawk a ni. A nunna atana pawimawh em em, a chenna tui kha thlak ni la chuan a harsatna kha awlsam em emin I chinfel sak mai tur. Chutiang chu tih a nih loh chuan khawvel eng doctor mahin sangha harsatna hi an chingfelin an tidam ngai lovang.

A chang chuan I dam lohna chingfel tur hian a tihdan phung tha ber (ultra-scientific approach) I dap kher a tul lo a, I mihring pianpui finna hman a ngaih chang a awm fo a, chu tiang chu tunlai doctor tam takin an haider fo thin thil pakhat a ni.

AIRPORT ANOLOGY (Thlawhna tumhmuh tehkhin thu)

Airport hi I taksa angin ngai ta la. Zinveivak (passenger) lut chhuak ho chu I thil ei (food) Carbohydrate emaw sugar-ah ngai bawk la. Tichuan Zinveivak (carbohydrate emaw sugar-a vuah bawkte) chu an chuanna tur thlawhna (aircraft, taksaa cell chi hrang hrang tia kan vuah bawk) ahte chuan thiar luh an ngai ta a. Zinvakte thiar tur chuan bus ( taksaa insulin)-te an awm a tul bawk a.

Dan pangngaiah chuan zinvakte (food – carbohydrate/sugar) hi an lo thlen/tumin Bus (insulin)-in an chuan lehna tur Aircraft ( cells of the body)-ah tibuaitu awm hauh lovin a thiar zung zung thin. Airport chhung hnathawh dan emaw chet vel dan (system) chu a felfai (harmony) thlarh a ni. Chu chu HEMOSTASIS of the body an tih chu a ni a. Glucose haemostasis of the body a tih theih bawk ang.

Airport chhung chet vel dan fel thlarha a awm lai chuan, zinvakte (food-crbohydrate/sugar) thiartu ber BUS (Insulin) kha tawp ta se, emaw hna thawk tha thei lovin awm ta se, enge lo thleng ang? Zinvakte (Food – carbohydrate/sugar) kha kal ngaihna hre lovin an awm khawm ang a, eng emaw hnu phei chuan airport (Body) chhungah an lo tam lutuk (crowded) hial ang a, chutih lai chuan aircraft (cells) ho kha luahtu nei lovin an lo ruak thung ang. Chutianga Taksa (airport)-in zinvakte thiartu Bus (insulin) a tlakchham emaw hna a thawh mumal theih lohna chu DIABETES TYPE 1  an tih chu a ni.

Bus (Insulin) berin hna a thawh mumal loh takah chuan airport (body -mihring taksa) thuneitute chuan, bus-in hna a thawh mumal loh apiang chuan, Bus dang (insulin), an ngaihtuah a tul ta a. Chu tiang chu doctor-in Diabetes type 1 natna nei damdawi a chawh thin ang chu a ni ta a ni.

Bus-in (Insulin) regular takin hna thawk mahse a kawngka emaw a inhawn that loh vanga zinveivakte (food/carbohydrate/sugar) an luh that theih loh chang a awm thei bawk a. Chutiangah chuan zinveivak (food-crbohydrate/sugar) tlemte te chauh aircraft-ah (mihring cell) an lut thei dawn tihna a ni. Chutianga aircraft-a lut ve si, a nih tur ang ni lo, hnathawk muang lutuk chu DIABETIES TYPE 2  tiin a vuah theih bawk ang.

Chutiang thil a thlen chuan airport thuneitute chuan a siam thiam (technician) ruaiin terminal kawngkaah an lo ding ang a, tichuan Bus kawngka inhawng tha thei lo chu eng emaw changing an lo hawng thin ang. Chutiang chu diabetes damdawi Metformin in hna a thawh dan a tih theih bawk. Airport thuneitu ten chutiang anga kum tam bus dang ruai emaw technician ruaia airport an enkawl chuan airport chu a thing tulh tulh ang a, a buai nuai chang a awm ang a, a nih tur anga airport a awm loh miau avangin airport chu a rawih tulh tulh ang.  Chutiang chu a ni diabetes natna vein insulin emaw damdawi dang a hman avanga mit delna, taksa tan ngai, kal chhia, lung tha lo, thluak hnathawh avanga tluk (stroke) a lo neih/tawn thin dan chu ni.

SCIENTIFIC CONSPIRACY (Thiamna hmanga inphiarrukna)

Dt. 30th, July, 2014 khan OPD pakhatah chuan dam lo tam tak inentir tur an awm a. Dam lo tam tak chu damdawiin lar tak tak AIIMS te, Ganga Ram Hospital te, Apollo hospital te pan tawh, mahse a hnua kan dam lo enkawl tawh pakhatin kan hnena a lo tirhte an ni tlangpui hlawm a. Chutianga dam lo khirh leh damdawiin lian lo pan tawhte lo kal khawmna chu damdawiin ropui take maw, doctor rual thiam em em awm khawmna hmun emaw I ti maithei mahse a ni hauh si lo. Mak I tih em em turin ka office mai a ni.

Kei leh ka team-te chuan ‘taksain a nihna pangngai anga hna a thawh leh theih’ dan (Homeostasis – body inner balance) mai kha kan thil tum ber a ni a. Dam lo chi hrang hrang  infertility a ni emaw, BP sang an ni emaw, arthritis an ni emaw an life style-in a ken tel natna eng pawh ni se; dam lo, a natna lo awm chhan ber hriattir a, a diet thlak tur leh a life style a tih danglam theih nana tanpuina lo pek a, natna hneh tur leh um bo tura lo puih kha kan tum ber a ni…..
(Heng chen hi a bu entawn a, a ziak ang anga letling ni chiah si lo, let deuh roh si a ka lawr khawm theih ni se...)

Tichuan, damdawi pakhatmah chawh hauh lovin, D1D2C DIET (Diabetic type 1 & 2 Cure tihna a nih hmel) thlai leh thei lam vek atanga ei tur (DIET) a hmuhchhuah hmangin an lo enkawl ta thin. Diabetic type 1 leh type 2 hi, diet ang thlapa dam loin a ti peih a nih chuan an dam zel….tih vel a ni.... he lehkhabu-in a tarlan tlangpui chu.

Phur thut hunah D1D2C DIET hi chipchiar deuhin, he thu ziak chul mamna nen ka la lo ti leh ang