THUHMA:
Sunday School, Senior B zirlaibu TIRHKOH PAULA LEH A ZIRTIRNA tih chu Pathian leh hotute duhsaknain ka ziak ve hlauh mai a. Ka ziah chhung zawng hian DIARY hranpa ka siamin ka ziak thin a. Ni tinin ka ziak hran lova; eng emaw thil pawimawh leh inbih let changa la ngaihnawm tura kia rin ziah khawmna a ni ber. Chung chu tawite ka han dah chhuak a, min chhiar sakte an awm a, chhiar chhunzawm duhte an awm mial chuan a tul angin kan la dah belh zel thei ang chu.
__________________________
1. Rev Pu Dula, Directir Christian Education Department lehkha, Senior B, Sunday School zirlai bu ziak tura hriattirna, July 12, 2016-a a ziah chu; July,2016 vekah ka hmu a.
2. Hun rei lote chhungin ‘zirlai bu ziak tura inbuatsaihna’ (min kaihruaitu tur thu pawimawh) ka duang nghal a. Tichuan 2017 leh 2018 hi chu lehkhabu pawimawh lak khawm nan leh ka ziah dan tur content thlan khawm nan ka hmang a ni ber.
3. Theology hi ka subject a ni lova, Communication hi ka subject a ni. Chuvang chuan Paula chanchin leh sulhnu inziahna lehkhabu ka lo nei hauh lova, kum hnih chhung ka dap khawm a. He diary ka ziah lai hian Rs. 20,000/- emaw chu ka inseng ve tawh awm e.
4. 2017-2018 kum hian, ziak tan tura bul ka tan mai lohna chhan dang pakhat a awm a; ka Laptop hman lai a chhia a. 2018 kumin Laptor thar ka lei a. Mahse chupawh chu 2018 kum tawp lamah a chiangnial lo leh tlat mai a. 2019 kuma zoram kan haw tumin ka U-in (Kan unau zinga upa ber) a leina tur Rs. 20,000/- emaw vel min pe a, chu chu belhchhahin a dang ka lei leh ta a ni. S.S zirlai bu ziak tura inbuatsaihna pakhat, Laptop lei nan ringawt Rs. 60,000/- vel ka seng der tihna a nih chu.
5. Kum 2019 September thlain Chapter 1 atangin ka ziak tan ta a, ka tui ta hle mai a. September thla chhung ringawt chuan bung 5 thleng ka ziak ta mai a! Tichuan, ‘Aaa, hetianga ka ziah chak dawn chuan, a hmanhmawhthlak lutuk loh hi’ tiin ka chawlhsan leh a. Tichuan January 2020-ah bung 6 & 7-na ka ziak leh ta a ni. February thlain bung 8-na ka zo a. A chhunzawmna tur ka duang nghal bawk.
6. Kum thum kum li hnu lam daiha zir tur a nih avangin, kum 3 hnu lam ami tur tuna (2019-2020) ka ziah vak mai chuan, kum 3 hnu lama khawvel thar? lo awm tur context hre hauh lovin kan ziak dawn tihna a ni a; ‘Pathian hnen ata finna leh hriatna kan va mamawh tehlul em’ tihte rilruah a awm reng thin. Chuvang chuan ziak chhunzawm tura ka thut apiangin Pathian hnenah ka inkawl tir a, Tawngtai hmasa lova ka ziah a awm mial a nih pawhin, kut tang thlaih tham lek zah a ni ang.
7. Zanin, Dt. 25.02.2020 (Tue @ 10:00 PM) bung 8 ka ziah zawh zan hian, ka Laptop hman rim zawk, nuar thin (a On theih a, ni hnih thum hnua On theih lohin awm leh mai thin. Tichuan ni thum or chawlhkar khat hnu emaw velah On theihin a awm leh mai thin bawk) chu ‘Pathian hnena hlan thianghlim duhna rilru nen’ ka han On chin a. A On leh theih ta mai a. Tichuan Pathian hnenah ka hlan thianghlim ta a ni.
8. Paula lehkhathawn ziaktu chungchangah hian, thunhnai (contemporary theologian) critics tam takin 13 epistles te hi Paula ziak vek a nih an ring lo va. Chuvang chuan a zir tur, chinchang hre tak takte venthawnna rilru nei chungin ‘Paula ziak ngei a nih zia, tan run lo zawngin’ zirlai chhunga sentence thenkhat pawh ka tarlang lui ve deuh a ni (For Eg: Paula a tan laia ziah a nih rin a ni, he lehkhathawn hi Rom tanina a tan laia ziah leh A.D 60 bawra ziah a nih rin a ni – ‘Paula ziak/h a ni’ tia tarlan kher hi avoid luih deuh a ni).
9. Tumkau Pathian ni (Palm Sunday) zir atana ka thlan hi, rilruah thupui dang a awm mai loh avangin, ka sual nasa angreng viau. Covid19 boruak-in min nang ta bawk nen, thla khat zet chu chhunzawm lovin ka rial hial a ni. Mahse, Easter Monday (13.04.2020) a lo nih chuan; Lalpan ziak thei turin bul tan min remtih sak ta a. Ni 5 chhung lekin ka zo a. A ni 6-na (Sat) ah chuan kalsan theiin ka zial fel vek a ni. Bul tan lawk thei lova, thla 1 zet ka rial tawh kha, Lalpa nen chuan chawlhkar 1 pawh tling lovah ka zo der mai! Zirlai thupui mal khaiah, ziak zo tura hun ka sen tlem pawl a ni hial awm e.
(To be continued...)
No comments:
Post a Comment