TESTIMONY - SIAM THAR KA NGAI KA PUM MAI HIANIN (INTROSPECTING ONE-SELF)

Tun hnai, eng emaw lai atang khan mahni induhkhawp lohna ka nei zauh zauh thin a. Ka huatthu a chhia a, dawhtheihna leh hriatthiamna ka tlachham zual bawk. Ka pal liam mai mai thin thil kha 'ka tawng' fo a. Pumpelh ka duh thin 'mi sawisel' ka awlsam ve zek a. Ka ngaihdan pela miin min deal nia ka hriat phei chuan an hriat lohvin 'ka chhu zui' zek thin.

Ni 3 vel liam ta atang khan, "kei hi eng ka tita nge mawni dawn le? Awlsamtea ka thil pal liam mai mai thin pawh ka khin zui hrep tak zel mai hi le? Engah nge ka huatthu hi a chhiat zek a, engah nge mi hriatthiamna hi ka tlakchham tak thut le?" tiin ka inzawt ru zauh zauh thin. Mahni ka inbih a 'a chhan' hria niin ka inhria.  Mahse, thlarau a thawh tel loh vang nge ni dawn (?),  a tha leh sawt zawnga thil kalpui turin chet  lak tumna reng reng ka nei thei chuang hauh lo.


KA INBIH LETNA TUR LALPAN MIN PE.

Nimin (19.11.2019) zan ka mu tur chu hlathu laklawh fahran mai, 'Ka pum mai hianin...' tih ringawt hi nung takin ka thinlungah a lo thleng a. A thluk ka hriatsa avangin ka nupui nen youtube-ah kan zawng dun ta a. A hnuaia hla hi ka inbih letna atan leh ka harh kawk kawh theih nana Lalpan min pek chu a ni ta a ni.


SIAM THARLEHNA/MIN SIAM THAR LEH RAWH.

Lalpa i rawngbawl a, ka vah laiin,
Thlemna tinreng ten min lo bawm thin;
Juda iangin ka phatsan thin che,
I tel lo chuan hring nun hian awmzia a nei mawlh si lo.

He lei hring nun buaina khawvelah hian,
Mahni hmasialin ka lo khat thin,
Chapona leh uangthuangin ka khat;
Siam tharlehna kross-ah min din thar leh rawh ka nun hi.

*Min siam tharleh rawh, min din thar leh rawh,
Ngui leh chau takin ka rum e.
Nun thara i rawng ka lo bawlleh theih nan, Siamthartu Lalpa min siam tharleh rawh.

Tisa dana nunga thlarau dovin,
Ka tlan thin a he khawvelah hian;
Lungngaih rumna tahna mai a ni,
Kros lam chauh chu thlira damchhung ni ka chhiar zel theih nan.

MIN SIAM THARLEH RAWH,
MIN DIN THAR LEH RAWH,
THLARAU THARA RAWNG KA BAWL THEIH NAN,
SIAM THAR KA NGAI, KA PUM MAI HIANIN,
SIAM THARNA KROS-AH MIN SIAM THAR LEH RAWH.


A SAWHKHAWK.

Youtub atangin Lalmuankima Pachuau sak chu ka download a (Bethsy aiin ka duh zawk). Mp3-a ka convert leh hnuin chatlak lova inplay chhunzawm reng turin ka dah a. Ka han ngaithla chu, ka chhungril ber thlengin min fan tan ta a. Lalpa Pathian hmaa inbun ruah thuai thuai ka duh laiin, ka nupui muthilh hun ka nghak ru ta a. Mahse, a muthilh mai bik loh avang chuan, "I muthilh hunah ka tawngtai ang chu ka ti a, mahse i muhil mai si lova, i tawngtai dun mai ang hmiang?" Ka tih chuan a insiam rem ve nghal mawlh mawlh a.

Tawngtai hmain, 'a ruka ka nun tuihalna, a chhan leh hla ka zawn leh ngaihthlak mek chu Pathian min pek ngei a ni a, siam thar hi ka ngai a, KA PUM MAI....(ka sawi chhunzawm thei tawh lo)...

Ka nupui chu zuang tho pahin, AMEN, AMEN, AMEN, LALPAN A HMANGAIH CHE, AMEEEN, I TAN HIAN KA TAWNGTAI THIN A SIN...tiin ring taka au chhuakin min kal hual a. Lawm leh lungchhe takin zan dar 1:00 vel chuan khum bulah chuan kan inkuah ta ngawt a. Tichuan mittui hruk sen rual loh nen Lalpa hmaah a siam tharlehna dil chung leh, min kan tharleh avanga lawmthu sawiin kan thingthi dun ta a ni.


MIN KHAWIHTU

He hla atanga min khawih na zual em emtu chu...
THLARAU THARA RAWNG KA BAWL THEIH NAN,
SIAM THAR KA NGAI, KA PUM MAI HIANIN,
SIAM THARNA KROS-AH MIN SIAM THAR LEH RAWH. Tih hi a ni a. Thlarau thara rawng ka bawlleh theihna tur chuan ka nun hian siam thar a lo mamawh hle tih hriattira ka awm chuan min tilawm hle nain min khawihna em em a. 'Siam tharna kros-ah min siam thar leh rawh' tiin Lalpa kan au a. Chawplehchilhin chhungril kaptu, ka tana hnawksak em emte khan min kian san a, Lalpa hian ral atang mai ni lovin, kei leh kan chhungkua hi he mi zan hian min kan thar leh ngei niin ka hria a, ka thinlung hi Lalpa chungah a hlimin a lawm takzet a ni. Lalpa chu fakin awm rawh se.

"Tunge maw ka nih a, ka chhûngte pawh hi tunge maw an nih a, heti chen chen min hruaia min kan thin hi ni?" 2 Samu 7:18

LALPA, KAN LAWM E.